صوبائی وزیر تعلیم شہرام خان ترکئی کا کہنا ہے کہ صوبے کے اسکولوں میں فرنیچر کی خریداری پر 6 ارب روپے خرچ ہوں گے۔

تفصیلات کے مطابق صوبائی وزیر تعلیم شہرام خان ترکئی نے پشاور میں تقریب سے خطاب کرتے ہوئے کہا کہ صوبائی کی ترجیح تعلیم ہے، ہر سال تعلیم کے بجٹ میں اضافہ ہورہا ہے۔

شہرام خان ترکئی نے کہا کہ 70 سال گزرنے کے باوجود آج بھی بچے اسکولوں میں ٹاٹ پر بیٹھتے ہیں، کروڑوں روپے سے اسکول بنتے ہیں لیکن لاکھوں روپے کا فرنیچر فراہم نہیں کیا جارہا، صوبے کے 28 اضلاع کے 24 لاکھ سے زائد بچوں کو 6 ماہ میں فرنیچر فراہم کررہے ہیں۔

انہوں نے کہا کہ پورے ملک کی تاریخ میں آج تک اتنے بڑے پیمانے پر بچوں کے لئے فرنیچر فراہم نہیں کیا، اسکولوں کی کمی اور اسکول میں بچوں کی تعداد زیادہ ہونے کی وجہ سے اسکولوں میں سیکنڈ شفٹ کا آغاز کیا ہے۔

صوبائی وزیر تعلیم کا کہنا ہے کہ پہلے مرحلے میں صوبے کے 120 اسکولوں اور دوسرے مرحلے میں 180 اسکولوں میں سیکنڈ شفٹ شروع کردی ہے، اگلے مرحلے میں 1 ہزار تک اسکولوں میں سیکنڈ شفٹ شروع کی جائے گی، بورڈز میں طلبہ کے لئے اسٹوڈنٹس فیسلیٹیشن سینٹرز قائم کررہے ہیں۔

شہرام خان ترکئی نے کہا ہے کہ اساتذہ کے تبادلے آن لائن کردیئے ہیں، اب ای ٹرانسفر کے ذریعے تبادلے ہورہے ہیں، اب اساتذہ کو تبادلے کے لئے سفارش کی ضرورت ختم ہوگئی ہے، داخلہ مہم کے ذریعے 9 لاکھ 65 ہزار سے زائد بچوں کو اسکولوں میں داخل کروایا گیا ہے۔

صوبائی وزیر تعلیم شہرام خان ترکئی نے مزید کہا ہے کہ محکمہ تعلیم نے 24 لاکھ سے زیادہ طلبہ کے لئے اسکولوں میں  فرنیچر فراہم کرنے کا سلسلہ شروع کر دیا ہے، وزیر اعلیٰ محمود خان نے منصوبے کا افتتاح بھی کردیا ہے۔