عبوری ہیڈکوچ ثقلین مشتاق کا کہنا ہے کہ قومی  ٹیم نے اچھا آغاز کیا اور اس وقت پر اعتماد ہیں۔

تفصیلات کے مطابق عبوری ہیڈکوچ ثقلین مشتاق نے ورچوئل پریس کانفرنس کرتے ہوئے کہا کہ افغانستان  کی ٹیم کیلئے اسپنرز بڑے اہم ہیں کیونکہ ان کے اسپنرزبہت اچھے ہیں۔

ثقلین مشتاق کا کہنا تھا کہ اسپنرزکے خلاف ہمیں اپنے پلانز کے مطابق کھیلنا ہے، پچز پر بڑا اسکور کرنا آسان نہیں ٹیکلنیکل طور پر مضبوط ہوکر کھیلنا پڑتا ہے۔

انہوں نے کہا کہ ہم نے ہر میچ کواہم قرار دینا ہے،ایک ہی مائنڈ سیٹ کے ساتھ کھیلنا ہے ،  بھارت اور نیوزی لینڈ کے خلاف جو میچز جیتے اور اعتماد ملا وہ ایک مائنڈ سیٹ کی وجہ سے ملا تھا۔

ثقلین مشتاق نے کہا کہ کھلاڑیوں نے جان ماری اب  اسی مائنڈ سیٹ کے ساتھ افغانستان کے خلاف کھیلنا ہے، ہم فخرزمان کو ون ڈاؤن سے ہٹانے کا نہیں سوچ رہے وہ وارم اپ میچز میں اچھا کھیلے تھے، فخر زمان کو اسی پوزیشن پر کھلانے کے پلان پر کلئیر ہیں ہم اس کے بارے فکر مند نہیں ہیں۔

انہوں نے کہا کہ ورلڈ چیمپئین بننے کے لیے مختلف کرکٹ کھیلنا ہے اور اس کو آگے لے کر کھیلنا چاہیے، سب ٹیمیں جیتنے کے لیے آئی ہیں انگلینڈ اور انڈیا کو بھی فیورٹ کہا جا رہا ہے۔

ان کا مزید کہنا تھا کہ بھارت سے فائنل سے مقابلہ ہوتا ہے تو اچھا مزہ آئے گا، پاک بھارت 2مقابلے ہو جائیں گے اس سے تعلقات بھی  بہتر ہوجائیں گے۔

ثقلین مشتاق نے یہ بھی کہا کہ  پاک بھارت کھلاڑیوں نے اس میچ میں دنیا کو پیغام دیا ہے، اب دوبارہ میچ ہوتا ہے تو کرکٹ آئی سی سی اور فینز کو فائدہ ہو گا۔

انہوں نے یہ بھی کہا کہ پوری ٹیم اچھا کھیل رہی ہے ہم اس کمبی نیشن سے خوش ہیں۔