قومی کرکٹ ٹیم کے سابق فاسٹ باؤلر محمد عامر قومی کرکٹ ٹیم کے پیچھے پیچھے دبئی کے لئے روانہ ہو گئے ہیں۔

تفصیلات کے مطابق فاسٹ باؤلر ٹی ٹوئنٹی ورلڈ کپ کے لیے اعلان کردہ اسکواڈ میں شامل نہیں ہیں۔

خیال رہے کہ گزشتہ برس دسمبر میں محمد عامر نے اس وقت کی ٹیم مینجمنٹ سے مایوس ہو کر کرکٹ سے ریٹائرمنٹ لینے کا فیصلہ کیا تھا۔

محمد  عامر نے یہ بھی کہا تھا کہ اگر انتظامیہ تبدیل ہوگئی تو وہ سلیکشن کیلئے دستیاب ہوں گے، محمد عامر کا کہنا تھا کہ سابق کرکٹرز 2010ء کی غلطی کو جواز بناکر پر مجھ پر تنقید کا کوئی موقع ہاتھ سے نہیں جانے دیتے ہیں۔

 بعد ازاں کرکٹ مینجمنٹ سے مایوس محمد عامر کے ریٹائرمنٹ کے معاملے پر پی سی بی نے آئندہ کسی بھی انٹرنیشنل میچ کے لیے ان کے نام پر غور نہ کرنے کا فیصلہ کیا تھا۔

 جون 2021ء میں اپنی ایک پریس کانفرنس میں قومی کرکٹ ٹیم کے اس وقت کے ہیڈ کوچ مصباح الحق نے محمد عامر کی ٹیم میں واپسی کے حوالے سے کہا تھا کہ وہ ریٹائرمنٹ کا فیصلہ واپس لے کر پرفارم کریں تو ٹیم میں آسکتے ہیں۔

اب محمد عامر نے اپنے حالیہ ٹویٹ میں بتایا ہے کہ وہ دبئی جارہے ہیں،فاسٹ بولر نے دبئی جانے کی وجہ اپنے ٹویٹ میں نہیں بتائی ہے لیکن یہ سب جانتے ہیں کہ ٹی ٹوئنٹی ورلڈ کپ کیلئے قومی اسکواڈ میں محمد عامر کا نام شامل نہیں ہے۔

off to dubai🥰 pic.twitter.com/XegJ3NA7Xm

— Mohammad Amir (@iamamirofficial) October 16, 2021

 خیال رہے کہ ٹی ٹوئنٹی ورلڈ کپ کے لیے پاکستان کرکٹ ٹیم بابراعظم کی قیادت میں دبئی پہنچ گئی ہے۔

 پاکستان ورلڈکپ میں اپنا پہلا میچ 24 اکتوبر کو روایتی حریف بھارت کیخلاف کھیلے گا۔