حکومت پنجاب کی جانب سے کورونا وائرس کے بتدریج کم ہوتے خطرہ کے پیش نظر پنجاب بھر میں لاک ڈاؤن میں نرمی کا فیصلہ کیا گیا ہے۔

تفصیلات کے مطابق پنجاب کے تمام 36 اضلاع کے لاک ڈاؤن آرڈر کا  اعلامیہ بھی  جاری کردیا گیا ہے جبکہ  اس آرڈر کا اطلاق 16 اکتوبر سے 31اکتوبر تک پنجاب کے علاوہ تمام اضلاع میں ہوگا۔

سیکرٹری عمران سکندر بلوچ کا کہنا ہے کہ مارکیٹ اور کاروباری مراکز 10 بجے تک کھل سکیں گے جبکہ پنجاب بھر میں ہفتہ کے ساتوں دن معمولات زندگی بحال رہیں گے۔

جاری کردہ اعلامیے کے مطابق ہوٹلز اور ریسٹیورنٹس میں انڈور ڈائننگ کی 50فیصد گنجائش کے ساتھ صرف ویکسی نیٹڈ افراد کو رات 11:59 تک اجازت ہو گی جبکہ آؤٹ ڈور ڈائننگ میں بھی رات 11:59 تک صرف ویکسی نیٹڈ افراد کے داخلے کی اجازت ہو گی۔

اسکے علاوہ  انڈور شادیوں کی تقریبات میں صرف 300 ویکسی نیٹڈ افراد کی گنجائش کے ساتھ اجازت ہو گی جبکہ آؤٹ ڈور شادیوں میں صرف 500 ویکسی نیٹڈ افراد کی اجازت ہو گی۔

تمام مزارات مکمل ویکسی نیٹڈ افراد کے لیے کھلیں رہیں گے جبکہ سینما گھر، کانٹیکٹ اسپورٹس اور جمز  مکمل ویکسینٹڈ افراد کے لیے کھلے رہیں گے۔

تمام نجی و سرکاری دفاتر بھی معمول کے اوقات میں 100 فیصد عملہ کے ساتھ کام کرسکیں گے جبکہ ریل سروس بھی  70فیصد گنجائش کے ساتھ چل سکے گی۔

واضح رہے کہ تمام تعلیمی ادارے بھی معمول کے اوقات میں 100فیصد حاضری کے ساتھ کھل سکیں گے جبکہ  12سال سے زائد عمر کے تمام طالب علم ویکسینیشن یقینی بنائیں گے۔