نیشنل ٹی ٹوئنٹی کپ کا رنگا رنگ میلا آج سے لاہور میں سجنے جارہا ہے۔

تفصیلات کے مطابق  سی سی پی او لاہور نے  اسٹیڈیم سے ہوٹل اور ہوٹل سے اسٹیڈیم تک سیکیورٹی کے فول پروف انتظامات مکمل کرلیے ہیں۔

سی سی پی او لاہور کا کہنا ہے کہ کرکٹ ٹیموں کو انٹرنیشنل اسٹینڈرڈ کے مطابق سیکیورٹی فراہم کی جائے گی ، 5 ایس پیز کی نگرانی میں 21 ایس ڈی پی اوز فرائض سرانجام دیں گے۔

ترجمان لاہور پولیس کے مطابق 53 ایس ایچ اوز،  22 ڈولفن ٹیمیں اور 20 پیرو ٹیمیں گشت پر معمور ہیں جبکہ فول پروف سیکیورٹی کے لیے ایلیٹ فورس کی 23 گاڑیاں اور سنائپرز بھی تعینات کیے گئے ہیں۔

سی سی پی او لاہور کا کہنا ہے کہ ٹیموں کے روٹس پر کوئی گاڑی اور  موٹرسائیکل کھڑی نظر نہ آئے ، ہم نے شائقین کرکٹ اور شہریوں کے لیے جامعہ ٹریفک پلان مرتب کیا ہے۔

انہوں نے مزید کہا کہ شائقین کرکٹ کو بذریعہ شٹل بس سروس پارکنگ اسٹینڈز سے اسٹیڈیم تک لایا جائے گا۔

واضح رہے کہ سی سی پی او لاہور کی الائیڈ محکموں کیساتھ مل کر سرچ اینڈ سویپ آپریشن جاری رکھنے کی بھی ہدایت کی گئی ہے اور ڈیوٹی میں غفلت،  کاہلی، لاپرواہی اور عدم توجہی کا مظاہرہ کرنے والے اہلکاروں کےخلاف سخت کارروائی کا حکم بھی دے دیا گیا ہے۔

خیال رہے کہ آج قذافی اسٹیڈیم میں دو میچز کھیلے جائیں گے، سندھ کا مقابلہ سینٹرل پنجاب سے ہو گا جبکہ دوسرامقابلہ  بلوچستان اور ناردرن کےدرمیان کھیلا جائیگا۔