صوبائی وزیر صنعت وتجارت میاں اسلم اقبال نے کہا ہے کہ بےروزگاری کے مسائل کے خاتمے کے لئے معیاری تعلیم کا فروغ ضروری ہے۔

تفصیلات کے مطابق صوبائی وزیر صنعت وتجارت میاں اسلم اقبال نے اپنے جاری کردہ بیان میں کہا ہے کہ ٹیکنیکل ایجوکیشن کو سٹریم لائن کرنے کے لئے ڈیجیٹل نظام متعارف کرایا گیا ہے، اس جدید نظام کے تحت نجی اور سرکاری تکینکی اداروں کی پنجاب سکل ڈویلپمنٹ اتھارٹی میں آن لائن رجسٹریشن کا عمل جاری ہے۔

صوبائی وزیر صنعت وتجارت میاں اسلم اقبال کا کہنا ہے کہ اب تک 13سو زائد تکنیکی اداروں نے پی ایس ڈی اے میں رجسٹریشن کے لئے آن لائن اپلائی کیا ہے، درخواست جمع کرانے سے لیکر رجسٹریشن سرٹیفکیٹ کے اجراء تک یہ ایک مکمل خودکار نظام ہے، فنی تعلیم کے کورسسز کو جدید تقاضوں سے ہم آہنگ بنایا گیا ہے۔

صوبائی وزیر صنعت وتجارت میاں اسلم اقبال نے کہا ہے کہ ہنر مند نوجوانوں کی ملک اور بیرون کھپت کا بھی موثر نظام بنایا گیا ہے، ملک سے غربت اور بے روزگاری کے مسائل کے خاتمے کے لئے معیاری فنی تعلیم کا فروغ وقت کی ضرورت ہے، پنجاب حکومت نے ٹیکنیکل ایجوکیشن کے فروغ کے لئے بے مثال اقدامات کیے ہیں، صوبے میں 4 نئی ٹیکنیکل یونیورسٹیوں کا قیام بھی اسی سلسلے کی کڑی ہے۔

صوبائی وزیر صنعت وتجارت میاں اسلم اقبال نےاپنے بیان میں مزید کہا ہے کہ سرکاری اور نجی تکنیکی اداروں کو پنجاب سکل ڈویلپمنٹ اتھارٹی کی چھتری تلے لایا جارہا ہے۔