چوکوں چھکوں کی برسات میں ٹی ٹوئنٹی ورلڈ کپ میں پاکستانی ٹیم کل پیر سے اپنے مشن کا آغاز کرے گی۔

تفصیلات کے مطابق میگا ایونٹ سے قبل پاکستان اپنا پہلا وارم اپ میچ ویسٹ انڈیز کیخلاف (کل )پیر کو دبئی میں کھیلے گا،میچ پاکستانی وقت کے مطابق سہ پہر3بجے شروع ہو گا۔

پاکستانی ٹیم اپنا دوسرا وارم اپ میچ20اکتوبر کو جنوبی افریقہ کیخلاف کھیلے گی ، قومی اسکواڈ نے دبئی میں پہلے ٹریننگ سیشن میں بھی حصہ لیاجو3گھنٹے تک جاری رہا۔

اس موقع پر قومی ٹیم کے نئے بیٹنگ کنسلٹنٹ میتھیو ہیڈن بھی موجود تھے جنہوں نے کھلاڑیوں کو مفید مشورے دئیے، قومی کرکٹ ٹیم اس وقت دبئی میں موجود ہے۔

قومی ٹیم کے کھلاڑیوں نے ایک روزہ آئسولیشن مکمل کر لی ہے ،اتوار کوقومی اسکواڈ نے دبئی کے مقامی ہوٹل میں مسلسل دوسرے روز جم سیشن میں حصہ لیا جو2گھنٹے تک جاری رہا ،جس کے بعد قومی ٹیم نے شام کو آئی سی سی اکیڈمی کے گراؤنڈ میں نیٹ سیشن بھی کیا۔

قومی اسکواڈ کا دبئی میں پہلا ٹریننگ سیشن 3گھنٹے تک جاری رہا،جس میں کھلاڑیوں نے بیٹنگ ،باؤلنگ اور فیلڈنگ کی مشقیں کیں ۔

واضح رہے کہ ٹی ٹوئنٹی ورلڈ کپ میں 24اکتوبر کو پاکستان کا مقابلہ انڈیا کیساتھ دبئی انٹرنیشنل کرکٹ اسٹیڈیم میں ہو گا،26اکتوبر کو پاکستان بمقابلہ نیوزی لینڈ،شارجہ کرکٹ اسٹیڈیم،29اکتوبر کو پاکستان بمقابلہ افغانستان، دبئی،2نومبر کو پاکستان بمقابلہ اے ٹو ابوظہبی،7نومبر کو پاکستان بمقابلہ بی ون،شارجہ میں کھیلا جائیگا۔

10نومبر کو پہلا سیمی فائنل ابوظہبی،11نومبر کو دوسرا سیمی فائنل دبئی جبکہ 14نومبرکوفائنل دبئی انٹرنیشنل کرکٹ اسٹیڈیم میں کھیلا جائیگا۔

یاد رہے  کہ ٹی ٹوئنٹی ورلڈ کپ کے لیے پاکستان کرکٹ ٹیم کے دبئی پہنچنے کے بعد کوویڈ ٹیسٹ کے رزلٹ منفی آنے کے بعد پیر سے ٹی ٹوئنٹی ورلڈ کپ کی تیاریوں کا آغاز کرے گی۔

ترجمان کے مطابق قومی اسکواڈ نے دبئی کے ہوٹل میں پہلے روز 2 گھنٹے سے زائد کا جم سیشن کیا،کھلاڑیوں نے ریکوری کے لیے پول سیشن میں بھی حصہ لیا۔