صوبائی وزیر صنعت و تجارت میاں اسلم اقبال کا کہنا ہے کہ پنجاب روزگار اسکیم کے تحت آسان قرضوں کی فراہمی کے عمل کو تیز کیا جائے گا۔

تفصیلات کے مطابق صوبائی وزیر صنعت و تجارت میاں اسلم اقبال اور وزیر خزانہ مخدوم ہاشم جواں بخت کی زیر صدارت اسٹیئرنگ کمیٹی کا سول سیکرٹریٹ میں اجلاس ہوا جس میں پنجاب روزگار اسکیم پر پیش رفت کا جائزہ لیا گیا۔

اجلاس میں پنجاب روزگار اسکیم کے تحت درخواستوں کی جانچ پڑتال اور قرضوں کی تقسیم کے عمل کو تیز کرنے کے لئے مختلف تجاویز پر بھی غور کیا گیا۔

اسٹیئرنگ کمیٹی نے 20 لاکھ رورپے تک کا آسان قرضہ پنجاب اسمال انڈسٹریز کارپوریشن کی جانب سے فراہمی کی تجویز کا جائزہ لیا۔

کمیٹی آئندہ اجلاس میں سفارشات پیش کرے گی جس کی روشنی میں لائحہ عمل بنایا جائے گا۔

میاں اسلم اقبال نے کہا ہے کہ پنجاب روزگار اسکیم کے تحت آسان قرضوں کی فراہمی کے عمل کو تیز کیا جائے گا، مفاد عامہ کی اس اسکیم سے 16 لاکھ افراد کے لئے روزگار کے مواقع پیدا ہوں گے۔

صوبائی وزیر صنعت و تجارت میاں اسلم اقبال نے مزید کہا ہے کہ قرضہ کے حصول کے لئے درخواستوں کی جانچ پڑتال اور قرضوں کی فراہمی میں تیزی لائی جائے گی، پنجاب روزگار اسکیم کے تحت اب تک 815 افراد میں 46 کروڑ روپے کے قرضے تقسیم کیے جاچکے ہیں۔

دوسری جانب صوبائی وزیر خزانہ مخدوم ہاشم جواں بخت نے ہدایت دی ہے کہ پنجاب روزگار سکیم کے تمام پہلوں کا جائزہ لے کر آئند اجلاس میں جامع تجاویز پیش کی جائیں۔

واضح رہے کہ سیکرٹری صنعت وتجارت واصف خورشید، ایم ڈی پنجاب اسمال انڈسٹریز کارپوریشن محمد طاہر وٹو، منصوبہ بندی و ترقیات اور محکم خزانہ کے افسران کی اجلا س میں شریک تھے۔