وزیر خارجہ شاہ محمود قریشی نے کہا ہے کہ انگلینڈ ٹیم کا دورہ بغیر مشاورت کینسل کرنے سے نقصان ہوا۔

تفصیلات کے مطابق وزیر خارجہ شاہ محمود قریشی نے اپنے ایک بیان میں کہا کہ دورہ ء برطانیہ کے دوران لندن میں برطانوی ہم منصب کے ساتھ ہونیوالی ملاقات میں کرکٹ ٹیم کے دورے کی یکطرفہ منسوخی کا معاملہ اٹھایا تھا۔

وزیر خارجہ نے کہا کہ انگلینڈ ٹیم کے دورہ کینسل ہونے پر دونوں ممالک کے کرکٹ شائقین میں مایوسی تھی  جبکہ انگلینڈ ٹیم کا دورہ بغیر مشاورت کینسل کرنے سے نقصان بھی ہوا۔

 شاہ محمود قریشی کا کہنا تھا کہ سرکاری ٹی وی ،عوام، پی سی بی سب کا نقصان ہوا جس پر معاملہ اٹھایا تھا، برطانوی وزیر خارجہ نے کہا کہ یہ انکی حکومت نہیں کرکٹ بورڈکا فیصلہ تھا۔ برطانوی وزیر خارجہ نے یقین دہانی کروائی کہ وہ ہمارے تحفظات برطانوی کرکٹ بورڈ تک پہنچائیں گے، اس خبر سے لگتا ہے کہ پاکستان کا نقطہ نظر رجسٹرہوا ہے۔

وزیر خارجہ شاہ محمود قریشی کا مزید کہنا تھا کہ ہمارا مقصد سمجھانا تھا کہ ایسے فیصلے کرنے سے اثرات مرتب ہوتے ہیں، ایسے فیصلوں سے کھلاڑیوں ،شائقین کو مشکلات کا سامنا کرنا پڑتا ہے۔

واضح رہے اس سے قبل وزیر خارجہ مخدوم شاہ محمود قریشی کی برطانوی دفتر خارجہ میں برطانوی وزیر خارجہ لِزٹرس سے ملاقات ہوئی  تھی جس میں دو طرفہ تعلقات، باہمی دلچسپی کے کثیرالجہتی شعبہ جات میں دو طرفہ تعاون کے فروغ اور علاقائی سلامتی سمیت اہم امور پر تبادلہ خیال کیا گیا تھا۔

ملاقات میں وزیر خارجہ مخدوم شاہ محمود قریشی نے برطانوی ہم منصب کو مقبوضہ جموں و کشمیر میں جاری بھارتی مظالم اور خطے کے امن کو درپیش خطرات سے آگاہ کیا  تھا جبکہ وزیر خارجہ نے پاکستان کی جانب سے افغان شہریوں کو بھجوائی گئی انسانی امداد اور انسانی راہداری کے قیام سے بھی برطانوی وزیر خارجہ کو آگاہ کیا تھا۔

اس موقع پر وزیر خارجہ مخدوم شاہ محمود قریشی نے کہا  تھاکہ مقبوضہ کشمیر میں انسانی حقوق کی سنگین پامالیوں کے حوالے سے برطانوی پارلیمنٹ میں مباحثے کا انعقاد، قابلِ تحسین ہے، ہمیں توقع ہے کہ برطانیہ، نہتے کشمیریوں کو بھارتی استبداد سے نجات دلانے اور ان کے جائز حق “حق خود ارادیت” کے حصول کیلئے اپنا موثر کردار ادا کریگا۔

شاہ محمود قریشی نے یہ بھی کہا  تھا کہ موجودہ صورتحال میں پاکستان کی اولین ترجیح افغانستان کو پنپتے ہوئے انسانی بحران سے بچانا ہے، پاکستان نے کابل سے دس ہزار سے زائد غیر ملکی شہریوں کو بحفاظت نکالنے میں معاونت فراہم کی۔

وزیر خارجہ مخدوم شاہ محمود قریشی نے مزید کہا  تھا کہ موجودہ حالات میں ضرورت اس بات کی ہے کہ عالمی برادری ماضی کی غلطیوں سے سبق سیکھتے ہوئے افغانستان کو تنہا نہ چھوڑے۔ عالمی برادری افغانستان کو انسانی بحران سے بچانے کیلئے ان کی انسانی و معاشی معاونت کو یقینی بنائے۔