قائد حزب اختلاف سندھ حلیم عادل شیخ نے کہا ہے کہ سندھ میں شیڈیول کاسٹ کو پی ٹی آئی مکمل نمائندگی دے گی۔

تفصیلات کے مطابق پاکستان کولہی اتحاد کے وفد کی قائد حزب اختلاف سندھ حلیم عادل شیخ سے ملاقات ہوئی جس میں کولہی اتحاد کے وفد نے سندھ میں شیڈیول کاسٹ کے مسائل سے آگاہ کیا۔

ملاقات حلیم عادل شیخ نے سندھ میں شیڈیول کاسٹ کے مسائل کو ترجیحی بنیادوں پر حل کرانے کی یقین دھانی کروائی۔

 اس موقع پر  حلیم عادل شیخ کا کہنا تھا کہ سندھ میں پیپلزپارٹی نے شیڈیول کاسٹ کے مسائل کو حل نہیں کیا ہے، سندھ میں شیڈیول کاسٹ کو پی ٹی آئی مکمل نمائندگی دے گی۔

 قائد حزب اختلاف سندھ حلیم عادل شیخ کا مزید کہنا تھا کہ پی ٹی آئی شیڈیول کاسٹ کو مکمل نمائندگی دے گی ، شیڈیول کاسٹ کے مسائل کو ترجیحی بنیادوں پر حل کیا جائے گا۔

 واضح رہے اس سے قبل اپوزیشن لیڈر سندھ اسمبلی حلیم عادل شیخ  نے اپنے بیان میں کہا تھا کہ سپریم کورٹ رجسٹری میں کراچی کے بارے میں سماعت ہوئی ہے، سندھ حکومت کے مؤقف پر افسوس ہوا ہے۔

انہوں نے کہا تھا کہ کراچی کے لئے 11 سو ارب میں سندھ حکومت نے ساڑے چار سو ارب خرچ کرنے تھے، وفاقی حکومت نے اپنے حصے کا کام کر لیا ہے، کراچی کے نالوں سے 11 ہزار ٹن کچرا اٹھا لیا گیا، 54 کلومیٹر کی آر سی سی وال بننی ہے، 48 کلومیٹر روڈ بنایا جارہا ہے۔

حلیم عادل شیخ نے کہا تھا کہ نالوں کے اردگرد بحالی کے کام میں نقصانات پر این ڈی ایم اے نے سندھ حکومت کو رقم ادا کر دی ہے، 11 سو ارب میں وفاقی حکومت نے اپنے حصے کا کام کر لیا ہے، کراچی کے تین بڑے نالے محمودآباد نالا، گجر نالا اور کورنگی کے نالوں کی صفائی مکمل ہوچکی ہے۔

انہوں نے کہا تھا کہ انکروچمنٹ متاثرین کو وفاقی حکومت کی جانب سے رقم ادا کی جاچکی ہے، سندھ حکومت نے کے ایم سی کے 500 نالے ڈی ایم سے کے 54 نالے صاف نہیں کیے ہیں، ابھی تک سندھ حکومت کہہ رہی ہے کہ بحریہ ٹاؤن کے 446 ارب ملیں تو کام کریں گے، سندھ حکومت کے بیان پر کہوں گا کوئی شرم ہوتی ہے جو ان کو نہیں ہے۔

حلیم عادل شیخ نے کہا تھا کہ کراچی میں وفاقی حکومت کے منصوبے مکمل ہونے جارہے ہیں، کے فور منصوبے کا افتتاح ہورہا ہے، 55 کلومیٹر پر فریٹ کوریڈور بننے جارہا ہے۔

اپوزیشن لیڈر سندھ اسمبلی حلیم عادل شیخ نے مزید کہا تھا کہ کے سی آر منصوبے کے شروعات ہورہی ہے، گرین لائن منصوبہ بھی مکمل ہوچکا ہے 40 بسیں کراچی پہنچ چکی ہیں۔