وزیر خارجہ شاہ محمود قریشی نے کہا ہے کہ پاکستان میں جاپانی کمپنیوں کے لیے سرمایہ کاری کے وسیع مواقع موجود ہیں۔

تفصیلات کے مطابق جاپان کے سفیر کونینوری ماتسودا کی وزارتِ خارجہ میں وزیر خارجہ شاہ محمود قریشی سے الوداعی ملاقات ہوئی  جس میں دو طرفہ تعلقات ،مختلف شعبہ جات میں دو طرفہ تعاون کے فروغ سمیت باہمی دلچسپی کے امور پر تبادلہ ء خیال کیا گیا۔

ملاقات میں جاپانی سفیر نے وزیر خارجہ کو آگاہ کیا کہ ٹیوٹا کمپنی پاکستان میں ہائبرڈ کار سازی کے شعبے میں بھاری سرمایہ کاری کا ارادہ رکھتی ہے۔

  جاپانی سفیر کا کہنا تھا کہ جاپان پاکستان سے تربیت یافتہ افرادی قوت کے حصول کیلئے عملی اقدامات اٹھا رہا ہے اس ضمن میں ایک ہزار انجینیرز کے انٹرویو مکمل کیا جا چکے ہیں۔

جاپان کے سفیر  کونینوری ماتسودا کا مزید کہنا تھا کہ پاکستان میں فوڈ پراسیسنگ پلانٹس لگانے کیلئے جاپان کی کئ بڑی کمپنیوں نے گہری دلچسپی کا اظہار کیا ہے۔جائیکا ملتان میں نکاسی ء آب کے نظام میں بہتری لانے کیلئے اقدامات اٹھائے گی۔

اس موقع پر وزیر خارجہ نے پاکستان اور جاپان کے درمیان دو طرفہ تعلقات کے فروغ کے حوالے سے جاپانی سفیر کی خدمات کو سراہا جبکہ وزیر خارجہ نے جاپانی سفیر کیلئے نیک خواہشات کا  بھی اظہار کیا۔

 دوران ملاقات وزیر خارجہ شاہ محمود قریشی نے کہا کہ پاکستان وزیر اعظم عمران خان کے وژن کی روشنی میں اقتصادی ترجیحات کے ایجنڈے پر عمل پیرا ہے۔

وزیر خارجہ شاہ محمود قریشی نے  مزید کہا کہ پاکستان میں جاپانی کمپنیوں کے لیے سرمایہ کاری کے وسیع مواقع موجود ہیں۔ پاکستان جاپان کے ساتھ متبادل توانائی، انفارمیشن ٹیکنالوجی، سمیت باہمی دلچسپی کے شعبہ جات میں دو طرفہ تعاون کے فروغ کیلئے پر عزم ہے۔