شہبازشریف نے کہا ہے کہ قوم کو پی ڈی ایم سے بہت توقعات وابستہ ہیں۔

پاکستان مسلم لیگ (ن) کے صدر اور قائد حزب اختلاف شہبازشریف سے پی ڈی ایم کے رہنما شاہ اویس نورانی کی وفد کے ہمراہ ملاقات ہوئی۔

ملاقات ماڈل ٹاﺅن میں پاکستان مسلم لیگ (ن) کے صدر کی رہائش گاہ پر ہوئی۔

اس موقع پر شہبازشریف نے پی ڈی ایم کراچی جلسے کے موقع پرمہمان نوازی پر شاہ اویس نورانی کا شکریہ ادا کیا جبکہ شہبازشریف نے شاہ اویس نورانی کی پی ڈی ایم کے پلیٹ فارم سے کاوشوں کو سراہا۔

پاکستان مسلم لیگ (ن) کے صدر نے کہا کہ عوام کی مہنگائی سے بس ہوچکی ہے جبکہ حکومت اپنی نااہلی اور کرپشن کے ہاتھوں بے بس ہے۔

شہبازشریف کا کہنا تھا کہ عوام مہنگائی سے پس چکی ہے، پی ڈی ایم عوام کے حق کی آواز پوری قوت سے سامنے لائے گی۔

پاکستان مسلم لیگ (ن) کے صدر شہبازشریف کا مزید کہنا تھا کہ قوم کو پی ڈی ایم سے بہت توقعات وابستہ ہیں، مولانا فضل الرحمن کی قیادت میں پی ڈی ایم تاریخی کردار ادا کرے گی۔

ملاقات میں پی ڈی ایم کے رہنما شاہ اویس نورانی کی جانب سے شہبازشریف کے لئے نیک تمناﺅں کا اظہار کیا گیا۔

واضح رہے اس سے قبل اپنے ایک بیان میں مسلم لیگ ن کے صدراور قومی اسمبلی میں اپوزیشن لیڈر شہباز شریف کا کہنا تھا کہ عمران خان نے تیسری ترمیم کرکے این آراودیا،نیب آرڈیننس میں ترمیم کرکےخود کواورحکومت کواین آراودیاگیا۔

ان کا مزید کہنا تھا کہ نیب آرڈیننس میں ترمیم احتساب کی آڑمیں سراسرسیاسی انتقام ہے،کوئی شک نہیں نیب نیازی گٹھ جوڑاپوزیشن کونشانہ بنانے کے لیے ہے، نیب آرڈیننس میں ترمیم شیطانی ذہنیت کا واضح مظہر ہے۔