محکمہ تحفظ ماحولیات نے آج کا ائیر کوالٹی انڈیکس جاری کردیا ہے۔

محکمہ ماحولیات کی رپورٹ مطابق ٹاؤن شپ سیکٹر 2 میں اے کیو آئی 214 ریکارڈ کیا گیا ہے۔

محکمہ ماحولیات نے بتایا ہے کہ ٹاؤن ہال کے علاقے میں ایئر کوالٹی انڈیکس 221 ریکارڈ کیا گیا جبکہ اسمبلی ہال بذریعہ موبائل وین 422 ریکارڈ کیا گیا ہے۔

اس کے علاوہ نیشنل ہاکی اسٹیڈیم لاہور کا ایئر کوالٹی انڈیکس 391 ریکارڈ کیا گیا ہے۔

محکمہ ماحولیات نے یہ تمام ڈیٹا چوبیس گھنٹے کی بنیاد پر مرتب کیا ہے۔

واضح رہے کہ گزشتہ روز محکمہ تحفظ ماحولیات کی جانب سے جارہ کردہ ایئر کوالٹی انڈیکس کے مطابق لاہورکے مختلف علاقوں میں ائیرکوالٹی انڈیکس خطرناک حدوں کو چھورہا تھا۔

محکمہ تحفظ ماحولیات کی رپورٹ میں کہا گیا کہ لاہور شہرکی فضا انتہائی آلودہ ہے۔

اس سے قبل ایئرکوالٹی انڈیکس 424 ریکارڈ کیا گیا تھا جس کے باعث دنیا کے آلودہ ترین شہروں کی فہرست میں لاہورپہلے نمبر پر ہے۔ فضائی آلودگی اور اسموگ کی وجہ سے نزلہ، زکام، کھانسی اوردیگر انفیکشنز پھیلنے کا خدشہ ہے۔

دوسری جانب لاہورویسٹ مینجمنٹ کمپنی کی جانب سے اسموگ کے تدارک کے لیے ایل ڈبلیو ایم سی کا آپریشن ونگ متحرک کر دیا گیا جس نے سی ای او ایل ڈبلیو ایم سی کی ہدایات پر شہربھرمیں روڈ واشنگ اوراسکریپنگ کا خصوصی آغاز کردیا۔

ترجمان ایل ڈبلیو ایم سی کے مطابق روزانہ کی بنیاد پر جی ٹی روڈ، مال روڈ، کینال روڈ، فیروز پور روڈ، لٹن روڈ، عثمانی روڈ، ملتان روڈ، ایل او ایس،جیل روڈ، شاد مان،ہربنس پورہ ایوان تجارت اور ملحقہ شاہراہوں پر واشنگ کی جارہی ہے۔

سی ای او ایل ڈبلیو ایم سی رافعہ حیدر کا کہناتھا کہ مٹی اور دھول کے خاتمے کے لیے خصوصی ٹیمیں مکینیکل واشنگ پر مامور کی جاچکی ہیں جو روزانہ کی بنیاد پر 840 کلو میٹرروڈز کی مکینکل واشنگ اور سویپنگ کر رہی ہیں۔