مشیر قومی سلامتی معید یوسف کا کہنا ہے کہ پاکستان کی سلامتی کیلئے افغانستان میں امن واستحکام ضروری ہے۔

انہوں نے اسلام آباد میں پاکستان ازبکستان جوائنٹ سیکورٹی کے پروٹوکولز پر دستخط کی تقریب کے موقع پر پریس کانفرنس کرتے ہوئے کہا کہ ازبکستان کے مشیر قومی سلامتی 3 روز کے دورے پر پاکستان آئے ہوئے ہیں، آج صبح پاکستان اور ازبکستان نے قومی سلامتی کے حوالے سے مشترکہ ہروٹوکولز پر دستخط کیے ہیں۔

معید یوسف نے کہا کہ وزیر اعظم بار بار یہ بات کرتے ہیں کہ پاکستان جیو اکنامک پیراڈائم میں اپنے آپ کو ٹرانسفارم کررہا ہے، چین کے ساتھ سی پیک کا ایک پورا منصوبہ جاری ہے، وسطی ایشیا کے ساتھ ہماری اس طرح انگیجمینٹ نہیں رہی جس طرح ہونی چاہیے تھی، اس حوالے سے وزیر اعظم اور ازبک صدر نے گزشتہ ہفتے فون پر بات بھی کی تھی۔

انہوں نے کہا کہ افغانستان پر پاکستان اور ازبکستان کا موقف ایک ہے، دونوں ممالک کا موقف ہے کہ اس وقت افغانستان پر ایک تعمیری بات چیت کی جائے، اسطرح تعمیری بات چیت کی جائے کہ افغانستان پر کوئی انسانی المیہ جنم نہ لے۔

مشیر قومی سلامتی کا کہنا ہے کہ ہم دہشت گردی کے سب سے بڑِے وکٹم ہیں، ہماری سلامتی کے لیے ضروری ہے کہ افغانستان میں امن ہو، ہمارے پاس افغانستان سے ڈس انگیج کرنے کا کوئی آپشن نہیں ہے، ازبکستان اور پاکستان ایس سی او کے فورم پر بھی اکٹھے کام کر رہے ہیں، اس پروٹوکول میں منشیات و دہشت گردی کے انسداد،  نانسداد منشیات فورس و دیگر معاملات پر بات چیت ہوگی، ازبکستان کے ساتھ پہلے ہی اچھے دفاعی تعلقات موجود ہیں۔

انہوں نے کہا کہ نیشنل سیکورٹی ڈویژن اس پروٹوکول کی مرکزی اساس ہو گی،آج اتفاق ہوا کہ سیکورٹی کے حوالے سے سابقہ معاہدوں کو آگے لے کر چلیں گے، ازبک مشیر قومی سلامتی وزیر اعظم، وزیر خارجہ سے آج ملاقاتیں کریں گے،آج وہ جی ایچ کیو کا دورہ کریں گے اور کل وہ طور خم سرحد کا دورہ کریں گے جس میں ہمارے ہمراہ رزاق داؤد بھی ہوں گے۔

معید یوسف نے مزید کہا کہ پاکستان نے بارہا کہا ہے کہ اگر ہندوستان اپنے آپ کو درست کرے تو ہم بات چیت کو تیار ہیں، اگر افغانستان میں مستقل امن آتا ہے باہمی منسلکی کی راہداری میں افغانستان بھی اس کا حصہ بن جائے گا، اس سے افغانستان میں بھی خوشحالی آئے گی۔