چیئرمین پاک سرزمین پارٹی سید مصطفیٰ کمال کا کہنا ہے کہ عمران خان کی حکومت چلانے میں نااہلی کی وجہ سے پاکستان کو لوٹنے والے چوروں اور لٹیروں کو کلین چٹ مل رہی ہے۔

سید مصطفیٰ کمال نے کہا کہ موجودہ صورتحال میں جہاں ہر نئے روز ایک نئی آڈیو اور ویڈیو منظر عام پر آ رہی ہے، عام آدمی کا اداروں پر اعتبار جو پہلے ہی کم تھا وہ مکمل طور پر اٹھنے کا خطرہ ہے۔

سربراہ پی ایس پی نے کہا کہ عمران خان نے جھوٹ کی بنیاد پر عوام اور پاکستان کے اداروں کو سہانے خواب دکھا کر جھوٹ کا محل بنایا۔

ان کا کہنا تھا کہ  جب تک عوام اور اداروں پر حقیقت آشکار ہوئی تب تک غلط فیصلوں اور غلط پالیسیوں کے باعث پاکستان بدترین مالی بحران میں پھنس چکا تھا۔

سید مصطفیٰ کمال نے کہا کہ سفارتی سطح پر پاکستان تنہائی کا شکار ہوگیا، دوست ممالک پاکستان سے ناراض ہوگئے جبکہ عوام کا معیار زندگی بدترین ہوگیا، ایک کروڑ سے زائد افراد بےروزگار ہوگئے۔ ہوشربا مہنگائی ماضی کے تمام تر ریکارڈ توڑنے کے باوجود ناجانے کہاں جا کر رکے گی۔

ان کا کہنا تھا کہ یہ تمام تشویش ناک صورت حال ملک میں شدید مایوسی کا سبب ہے۔ اگر کسی قوم کو تباہ و برباد کرنا ہو تو اس سے امید چھین لی جائے۔ حکمرانوں نے قوم سے امید چھین لی ہے۔

مصطفیٰ کمال نے کہا کہ  پاکستانی قوم جو ہر آزمائش کے بعد ایک نئے جوش اور ولولے کے ساتھ مزید مضبوط ہوکر اٹھتی تھی، یہ پہلی دفعہ ہے کہ قوم کی موجودہ حکمرانوں اور خصوصاً انصاف فراہم کرنے والے اداروں سے مایوسی عروج پر پہنچ گئی ہے، جو ملک اور قوم کی بقاء کے لیے زہر قاتل ہے۔

مصطفیٰ کمال نے مزید کہا کہ موجودہ صورتحال میں ملکی دولت لوٹنے والے پارسا بن کر سامنے آرہے ہیں جو پاکستان کی سلامتی اور بقا کے لیے خطرناک ہے۔ تحریک انصاف کی نااہلی کے باعث آنے والے وقت میں پاکستان کو ناقابل تلافی نقصان پہنچنے کا خدشہ بڑھ گیا ہے۔