وزیر بلدیات سندھ ناصر حسین شاہ نے کہا ہے کہ نوجوانوں کو کھیلوں کی سہولیات کی فراہمی اولین ترجیح ہے۔

تفصیلات کے مطابق وزیر بلدیات سندھ ناصر حسین شاہ نے وزیر اعلیٰ سندھ کے معاون خصوصی علی احمد جان کے ہمراہ مومن آباد سائٹ میں فٹبال گراؤنڈ کا افتتاح کردیا۔

اس موقع پر  ناصر شاہ نے خطاب کرتے ہوئے کہا کہ کھیل کے میدان، صحت اور مثبت سرگرمیوں کا وسیلہ ہیں۔

وزیر بلدیات سندھ کا کہنا تھا کہ فٹبال، کرکٹ،ہاکی، باسکٹ بال اور والی بال جیسے کھیلوں کوفروغ دیں گے جبکہ آؤٹ ڈور کے ساتھ ساتھ ان ڈور گیمز کو بھی فروغ دیں گے۔

ناصر حسین شاہ نے کہا کہ اسکولوں، کالجوں اور یونیورسٹیوں میں کھیلوں کے مقابلے کئے جائیں گےجبکہ کراچی کے تمام اضلاع میں کھیل کے میدانوں کو بحال کریں گے ۔

وزیر بلدیات سندھ نے کہا کہ میدان میں فلڈ لائٹس، تماشائیوں کے بیٹھنے کے لئے نشستیں اور باؤنڈری وال بنائی گئی ہیں۔

ناصر حسین شاہ نے افسران کو ہدایات دیں کہ تمام کھیل کے میدانوں کو صاف ستھرا اور کھیلنے کے قابل رکھا جائے جبکہ پارکوں اور کھیل کے میدانوں کے ارد گرد تمام تجاوزات ختم کی جائیں۔

انہوں نے کہا کہ نوجوانوں کو کھیلوں کی سہولیات کی فراہمی اولین ترجیح ہے، سندھ حکومت نوجوانوں کو مثبت سرگرمیوں کے فروغ کے تمام مواقع فراہم کررہی ہے۔

وزیر بلدیات سندھ ناصر شاہ کا مزید کہنا تھا کہ پیپلز پارٹی کی ضلعی عہدیدار اور کارکن اپنے علاقوں کے میدانوں کو بحال رکھنے کے لئے معاونت کریں۔