مشیر خزانہ شوکت ترین نے سندھ اور بلوچستان میں آٹے کی قیمتوں میں کمی لانے کی ہدایات جاری کردیں۔

تفصیلات کے مطابق مشیر خزانہ شوکت ترین کی زیر صدارت نیشنل پرائس مانیٹرنگ کمیٹی کا اجلاس ہوا جس میں گندم، چینی، دالوں اور چکن سمیت دیگر اشیائے خوردنی کی قیمتوں کا جائزہ لیا گیا۔

سیکرٹری خزانہ نے  بریفنگ دیتے ہوئے کہا کہ ہفتہ وار بنیادوں پر مہنگائی میں 1.81 فیصد کا اضافہ ہوا جبکہ6 اشیاء کی قیمتوں میں کمی اور 15 اشیاء کی قیمتوں میں استحکام رہا۔

بریفنگ دیتے ہوئے کہا گیا  کہ مختلف اشیائے ضروریہ کی قیمتوں میں کمی کا رجحان دیکھا گیا جبکہ دال مونگ اور پیاز کی قیمتیں نمایاں کم ہوئیں۔

بریفنگ میں کہا گیا کہ پنجاب، کے پی اور وفاقی دارالحکومت میں 20 کلو آٹے کا تھیلا 1100 روپے پر مل رہا ہے۔

بریفنگ دیتے ہوئے کہا کہ پنجاب، کے پی اور اسلام آباد میں چینی کی قیمت میں مسلسل کمی کا جحان ہے، حکومت کے اقدامات سے اشیائے ضروریہ کی فراہمی اور دستیابی بہتر ہوئی ہے

بریفنگ دیتے ہوئےمزید  کہا  گیاکہ سندھ اور پنجاب میں کرشنگ سیزن شروع ہونے سے چینی کی پیداوار شروع ہوگئی ہے، چینی کے نئے ذخائر آنے سے قیمتوں میں کمی ہوسکے گی۔

اجلاس کی صدارت کرتے ہوئے مشیر خزانہ شوکت ترین نے  پنجاب، کے پی اور وفاقی دارالحکومت میں 20 کلو آٹے کا تھیلا 1100 روپے پر فراہمی کی تعریف  کی جبکہ مشیر خزانہ نے سندھ اور بلوچستان میں آٹے کی قیمتوں میں کمی لانے کی ہدایت بھی کی۔

شوکت ترین نے کہا کہ سندھ اور بلوچستان چینی کی قیمتوں پر کنٹرول کیلئے اقدامات کریں۔

مشیر خزانہ شوکت ترین  نےاجلاس میں  فرٹیلائزر کی آسان دستیابی کیلئے اقدامات کی  بھی ہدایت کی ۔

اجلاس میں وفاقی وزراء، مشیروں، معاونین خصوصی اور وزارتوں کے سیکرٹریز نے  شرکت کی۔