راجہ بشارت نےکہا ہے کہ ضمنی انتخابات کو شفاف بنانے کے لیے پنجاب حکومت ہر ممکن اقدامات کرے گی۔

وزیر قانون پنجاب راجہ بشارت کی زیر صدارت سول سیکرٹریٹ میں کابینہ کمیٹی لاء اینڈ آرڈر کا اجلاس ہوا ،اجلاس کے دوران این اے 133 لاہور اور پی پی 206 خانیوال میں ضمنی انتخابات کے لیے سیکیورٹی انتظامات کا جائزہ لیا گیا۔

 اجلاس میں بریفنگ دیتے ہوئے کہا گیا کہ ضمنی الیکشن کے موقع پر موثر انتظامات کے لیے کنٹرول روم قائم کیے جائیں گے جبکہ لاہور میں کل 254 پولنگ اسٹیشنوں پر 4 ہزار پولیس کی نفری اور 730 رینجرز ڈیوٹی دیں گے۔

بریفنگ دیتے ہوئے مزید  کہا گیا کہ پولنگ بوتھ تک انتخابات کے سامان کی ترسیل مکمل سیکیورٹی کے ساتھ کی جائے گی، ووٹرز اور عملے کی حفاظت کے لیے ریسکیو سروس، سول ڈیفنس اور میڈیکل ایڈ کا عملہ بھی الرٹ رہے گا۔

اجلاس کی صدارت کرتے ہوئے وزیر قانون پنجاب راجہ بشارت نےکہا کہ جنوبی پنجاب کی انتظامیہ ڈیرہ غازی خان اور راجن پور کے قبائلی علاقوں میں امن وامان کو یقینی بنائے۔

 راجہ بشارت کا مزید کہناتھا کہ الیکشن سے پہلے اور الیکشن کے دوران ضلعی انتظامیہ کے افسران الیکشن کمیشن حکام کے ساتھ قریبی رابطہ رکھیں، ضمنی انتخابات کو شفاف بنانے کے لیے پنجاب حکومت ہر ممکن اقدامات کرے گی۔

اجلا س میں ایڈیشنل چیف سیکریٹری ساؤتھ پنجاب اور ڈی سی و ڈی پی او خانیوال کی ویڈیو لنک کے ذریعے بریفنگ دی جبکہ آئی جی پنجاب ، ایڈیشنل چیف سیکریٹری داخلہ سی سی پی او، ڈی آئی جی آپریشن اور الیکشن کمیشن کے افسران نے بھی شرکت کی۔