معاون خصوصی وزیرِ اعلیٰ پنجاب برائے اطلاعات و ترجمان حکومت پنجاب حسان خاور نے کہا ہے کہ آج کا دن شفاف انتخابات کے حوالے سے تاریخ ساز دن ہو گا۔

معاون خصوصی وزیرِ اعلیٰ پنجاب برائے اطلاعات و ترجمان حکومت پنجاب حسان خاور نے پاکستان مسلم لیگ (ن) کی ترجمان مریم اورنگزیب کے بیان پر ردعمل دیتے ہوئے کہا کہ ن لیگ تاریخ کی دوسری سائیڈ پر کھڑی ہو کر ملک دشمنی کا ثبوت نہ دے، اوورسیز پاکستانیوں کو انتخابی عمل میں رائے دہی کا پورا حق ہے۔

انکا کہنا تھا کہ بریانی کی پلیٹوں پر ووٹ لینے والوں کو شاید (ای وی ایم) ہضم نہیں ہو رہی، کھوکھلی بیان بازی سے بہتر تھا اپوزیشن کوئی متحدہ حکمت عملی پیش کرتی۔

مزید کہا کہ اپوزیشن نے ووٹ کو عزت دو کا نعرہ لگایا، پی ٹی آئی نے اسے حقیقت کا روپ دیا، آج وزیرِ اعظم عمران خان پاکستان کے مستقبل کو یقینی اور غیر متنازعہ بنانے جا رہے ہیں۔

واضح رہے کہ پاکستان مسلم لیگ (ن) کی ترجمان مریم اورنگزیب نے پارلیمنٹ کے مشترکہ اجلاس پر بیان دیتے ہوئے کہا تھا کہ آج کی قانون سازی آئین اور قانون کے ساتھ کھلواڑ ہے، آج کی قانون سازی ماورائے آئین ہے۔

ان کا کہنا تھا کہ الیکشن کمیشن کے آئینی اختیارات پہ کوئی سمجھوتہ نہیں کریں گے، یہ ایک غیر جانبدار اور آزاد الیکشن کمیشن پہ حملہ ہے۔

انہوں نے کہا تھا کہ یہ انتخابی اصلاحات کی قانون سازی نہیں بلکہ سیلیکٹڈ عمران صاحب کا الیکشن چوری کا منصوبہ ہے، آج انشاءاللہ ایوان کے دونوں اطراف عوامی نمائندے عوام کی رائے کا قتل نہیں ہونے دیں گے۔

ان کا مزید کہنا تھا کہ عوام کا حق انتخاب چھیننا عملا آئین کو دفن کرنا ہے تین سالوں سے پاکستان کی عوام الیکشن چوری کا خمیازہ بھگت رہی ہے، عمران خان صاحب کو پتہ ہے کہ عوام نے آٹا چینی، بجلی، گیس اور دوائی چوروں کو ووٹ نہیں دینا ہے۔