وزیراعظم کی معاون خصوصی برائے سماجی تحفظ ڈاکٹر ثانیہ نشتر کا کہنا ہے کہ وزیراعظم کی قیادت میں مستحق گھرانوں کیلئے راشن پروگرام لایا گیا ہے، اس پروگرام سے 2 کروڑ خاندان مستفید ہوں گے۔

پشاور میں خیبرپختونخوا اسمبلی میں ڈاکٹر ثانیہ کی زیر صدارت احساس راشن رعایت پروگرام پر صوبائی اسمبلی کے اراکین کے لیے بریفنگ کا انعقاد ہوا۔

جس میں دیگر اراکین صوبائی اسمبلی کے ساتھ ساتھ اسپیکر و ڈپٹی اسپیکر صوبائی اسمبلی، صوبائی وزیر خزانہ و صحت بھی شریک ہوئے جبکہ اس موقع پر نیشنل بینک کے اعلیٰ افسران بھی موجود تھے۔

بریفنگ کے دوران ڈاکٹر ثانیہ نشتر کا کہنا تھا کہ وزیراعظم کی قیادت میں مستحق گھرانوں کیلئے راشن پروگرام لایا گیا ہے، اس پروگرام سے 2 کروڑ خاندان مستفید ہوں گے۔

انہوں نے کہا کہ گھرانے کا کوئی بھی فرد 8171 پر رجسٹریشن کیلئے اپنا قومی شناختی کارڈ نمبر اس موبائل سم سے بھیجے جو اس کے نام پر رجسٹر ہو۔

ڈاکٹر ثانیہ نے کہا کہ کریانہ مالکان راشن پروگرام کیلئے احساس راشن ویب پورٹل پر ہی رجسٹر ہونگے، خیبر پختونخوا میں راشن پروگرام پر عملدرآمد صوبائی حکومت کے اشتراک سے ہو رہا ہے۔

انہوں نے مزید کہا کہ نیشنل بینک کا عملہ صوبے بھر میں کریانہ یا دیگر دکانداروں کی رجسٹریشن کیلئے بینک اکاؤنٹ کھول رہا ہے اور حکومت کی جانب سے کریانہ مالکان کو رعایتی رقم کے ساتھ ساتھ پرکشش کمیشن بھی دیا جائے گا۔

ڈاکٹر ثانیہ کا مزید کہنا تھا کہ کریانہ مالکان کو فی سہ ماہی گاڑیاں، موٹر سائیکل، موبائل فون اور دیگر انعامات بذریعہ قرعہ اندازی دیئے جائیں گے۔