یورپ میں جرمنی اور فرانس کے بعد رومانیہ میں بھی کورونا کی چوتھی لہر نے قہر برپا کررکھا ہے اور اسپتالوں میں لاشیں رکھنے کی جگہ کم پڑ گئی ہیں۔

سی این این کی رپورٹ کے مطابق یورپ کے کئی ملک کورونا وبا کی چوتھی لہر کی لپیٹ میں ہیں ، جن میں رومانیہ بھی شامل ہے۔ ہر روز ہزاروں افراد میں کورونا کی تشخیص ہورہی ہے اور وہاں کا طبی نظام تقریباً مفلوج ہوچکا ہے۔

رومانیہ کے دارالحکومت کے سب سے سرکارہ اسپتال بخارسٹ یونیورسٹی اسپتال میں قائم مردہ خانے میں 15 لاشیں رکھنے کی گنجائش ہے جب کہ وہاں 41 لاشیں موجود تھیں۔ اسپتال میں کام کرنے والی ایک نرس کا کہنا تھا کہ جب میں اس پیشے سے منسلک ہوئی تھی تو نہیں سوچا تھا کہ میں اس طرح کی زندگی گزاروں گی، اور ایسی تباہی ہو سکتی ہے کہ ہم پورے خاندان کو ان کی قبروں پر پہنچادیں گے۔

ماہرین کا کہنا ہے کہ رومانیہ یورپ میں سب سے کم کورونا ویکسینیشن کی شرح رکھنے والا ملک ہے، یہاں صرف 36 فیصد لوگوں نے ہی کورونا سے بچاؤ کی ویکسی نیشن کرائی ہے۔

دوسری جانب جرمنی میں بھی ایک ہفتے کے دوران ریکارڈ کورونا مریض سامنے آئے ہیں، ملک میں فی ایک لاکھ آبادی میں کورونا کے نئے کیسز کی ہفتہ وار اوسط اب چار سو ہو گئی ہے۔ ملک میں کورونا سے اب تک 99 ہزار سے زائد افراد لقمہ اجل بن چکے ہیں لیکن اس کے باوجود بری تعداد میں لوگ اس وبا کے پھیلاؤ کو روکنے کے لیے اقدامات پر عمل سے گریز کررہے ہیں۔