محکمہ بجلی کے کارکنوں نے حکومت سے مطالبہ کیا ہے کہ وہ بجلی چوری روکنے اور نجی تھرمل پاور ہاﺅسوں کی بجلی کے ریٹ کم کرکے بجلی کو سستا کرنے کی مہم کو کامیاب کرے۔

تفصیلات کے مطابق محکمہ بجلی کے کارکنوں نے حکومت سے مطالبہ کیاکہ بجلی چوروں کی لاقانونیت کے خلاف محکمہ بجلی کے کارکنوں کو تحفظ فراہم کرے، کنٹریکٹ اور ڈیلی لیبر کارکنوں کو مستقل کرنے ، لیبر قوانین پر تمام صنعتی و تجارتی اداروں اور محکمہ بجلی کے کارکنوں پر سختی سے عمل کرائے۔

 یہ مطالبات محکمہ بجلی واپڈا کے کارکنوں کے بھاری اجلاس زیراہتمام آل پاکستان واپڈا ہائیڈروالیکٹرک ورکرزیونین سی بی اے منعقدہ بختیار لیبرہال لاہور میں ایک قرار داد کے ذریعے کئے گئے جس کی صدارت بزرگ مزدور راہنماءخورشیداحمد نے کی۔

 اجلاس سے حاجی یونس، رانا عبدالشکور، اسامہ طارق،ملک زاہد،رانا شہباز احمد، میاں لیاقت، حاجی لیاقت علی،عمران بٹ ودیگر مزدور راہنماﺅں نے خطاب کیا۔

 اجلاس میں ایک خصوصی قرارداد کے ذریعے حکومت سے پرزور مطالبہ کیاگیا کہ وہ وسیع تر قومی مفاد میں بجلی کی منافع بخش کمپنیوں کو آئی ایم ایف کے دباﺅ پر کراچی الیکٹرک سپلائی کمپنی اور نجی تھرمل پاور ہاﺅسوں کے ناکام تجربہ کو سیکھتے ہوئے نجکاری نہ کرے بلکہ دیانتدار اور قابل انتظامیہ اور کارکنوں کے تعاون سے اس کی کارکردگی میں اضافہ کرے۔

 ایک قرار داد کے ذریعے اسمبلی کے ارکان سے پرزور اپیل کی گئی کہ وہ ملک میں غربت، جہالت، عام بے روزگاری کے مسائل حل کرانے کے قومی مقاصد کی تکمیل کے لئے اپنی تنخواہوں میں اضافہ نہ کرائیں بلکہ بانی پاکستان قائداعظم محمد علی جناح کی طرح صرف ایک روپیہ تنخواہ لیں-