لاہور کی شمالی چھاونی میں لڑکی سے زیادتی  کا معاملہ نیا رُخ اختیار کرگیا۔ مدعی مقدمہ نے میڈیکل کروانے سے انکار کر دیا۔

پولیس ذرائع کے مطابق مدعی مقدمہ کا کہنا ہے کہ واقعہ غلط فہمی کا نتیجہ ہے۔

قبل ازیں پب جی گیم سے ہونے والی دوستی میں لڑکی کو شادی کے جھانسہ دے کر زیادتی کا نشانہ بنا دیا گیا۔

کراچی کی لڑکی پب جی کھیلتے ہوئے ایک حارث نامی لڑکے کے جال میں پھنس گئی اور شادی کے جھانسے میں لاہور پہنچی۔

ملزم حارث نے متاثرہ لڑکی کو ڈی آئی جی انویسٹیگیشن لاہور کے دفتر کے بالکل قریب واقع روز ہوٹل میں 3 دن تک زیادتی کا نشانہ بنایا اور پھر ریلوے اسٹیشن پر چھوڑ کر روپوش ہوگیا، جہاں سے ایک گینگ اسے شمالی چھاونی کے علاقے میں ایک گیسٹ ہاوس لے گیا۔

گیسٹ ہاوس میں بھی لڑکی کو اجتماعی زیادتی کا نشانہ بنایا گیا۔ لڑکی ننگے پاوں بغیر دوپٹہ وہاں سے بھاگ نکلی۔

کینٹ کے علاقے میں رات گئے لڑکی کی چیخ و پکار سن کر حساس ادارے کے اہلکاروں نے فوری پولیس کو اطلاع دی۔ جس پر شمالی چھاونی پولیس نے مقدمہ درج کر لیا۔

دوسری جانب وزیراعلیٰ پنجاب سردار عثمان بزدار نے لاہور کے تھانہ شمالی چھاؤنی کی حدود میں لڑکی سے اجتماعی زیادتی کے واقعے کا نوٹس لیتے ہوئے سی سی پی او لاہور سے رپورٹ طلب کرلی۔

وزیراعلیٰ پنجاب نے واقعے میں ملوث ملزمان کی جلد از جلد گرفتاری کا حکم دیتے ہوئے ہدایت جاری کی کہ ملزمان کو قانون کی گرفت میں لا کر مزید کارروائی کی جائے۔

وزیراعلیٰ عثمان بزدار نے حکم دیا کہ متاثرہ لڑکی کو انصاف کی فراہمی میں کوئی کسر اٹھا نہ رکھی جائے۔