مسلم لیگ ن کے رہنما عطا تارڑ کا کہنا ہے کہ وزارت داخلہ نے عدالت میں کوئی ثبوت نہیں دیا ہے۔

بنکنگ کورٹ لاہورکے باہر مسلم لیگ ن کے رہنما عطا تارڑنے میڈیا سے گفتگو کرتے ہوئے کہا کہ ڈیڑھ سال سے منی لانڈرنگ کا کیس چل رہا ہے۔ وزارت داخلہ نے عدالت میں کوئی ثبوت نہیں دیا۔

عطا تارڑ نے کہا کہ عمران خان کو بیوقوف بنانے والا شخص شہزاد اکبر ہے۔

انھون نے کہا کہ قانون کے مطابق ایف آئی اے چودہ دن میں چالان عدالت میں جمع کروانے سے قاصر ہیں۔ ایف آئی اے ہر پیشی پر تین، تین ہفتے کی تاریخ مانگ رہا ہے۔

ان کا کہنا تھا کہ ڈیڑھ سال سے تاریخ پہ تاریخ مل رہی ہے۔ عدالت میں ایف آئی اے  کاغذ تب پیش کرے جب ان کے پاس کوئی ثبوت ہو۔

واضح رہے کہ بنکنگ کورٹ لاہور میں منی لانڈرنگ کیس میں شہبازشریف، حمزہ شہباز کی منی لانڈرنگ کیس میں عبوری ضمانت کی درخواستوں پر سماعت ہوئی۔

عدالت کی جانب سے تمام ملزمان کی عبوری ضمانت میں 11 دسمبر تک توسیع کی گئی۔

مسلم لیگ ن کے صدرشہبازشریف سمیت دیگر ملزمان عدالت میں پیش ہوئے۔

عدالت نے ایف آئی اے سے استفسارکیا کہ مقدمہ کے چالان سے متعلق کیا پیش رفت ہوئی؟

رایف آئی اے نےعدالت کو بتایا کہ ملزم عثمان ابھی شامل تفتیش نہیں ہوا، اس لیے تفتیش مکمل نہیں ہو سکتی۔

پراسیکیوٹر ایف آئی اے نےعدالت سے استدعا کی کہ عدالت 2 ہفتوں کی مہلت دی جائے۔

جس پر عدالت نےکہا کہ آئندہ ایف آئی اے کو چالان پیش کرنے کیلئے کوئی مہلت نہیں ملے گی۔