قومی کرکٹ ٹیم کے سابق ہیڈ کوچ معین خان نے کہا ہے کہ امید ہے کہ بابر اعظم کی کپتانی میں بتدریج بہتری آئے گی اور وہ زیادہ اچھے اور بہتر فیصلے کریں گے۔

تفصیلات کے مطابق قومی کرکٹ ٹیم کے سابق ہیڈ کوچ معین خان  نے کراچی میں میڈیا سے گفتگو کرنے ہوئے ہار جیت  کھیل کا حصہ ہے،  پاکستان نے عالمی کپ میں بہترین کارکردگی پیش کی، کھلاڑیوں کے درمیان بھی ہم آہنگی نظر آئی، ایک طویل مددت کے بعد پاکستان ٹیم اچھی شکل میں نظر آرہی ہے، یہ شروعات  ہیں،امید ہے کہ  پاکستان اسی طرح اچھی کاکردگی کا  تسلسل برقرار رکھے گا اور ٹیم بہتر سے بہتر ہوتی چلی جائے گی۔

معین خان کا کہنا تھا کہ  بدقسمتی سے پاکستان عالمی کپ میں سیمی فائنل سے آگے سفر جاری نہ رکھ سکا، ایونٹ  کے دوران بعض معاملات میں خلا نظر آیا، بابراعظم نے کپتان کی حیثیت سے کچھ غلطیاں بھی کیں، بطور کپتان بڑے فیصلے کرنے پڑتے ہیں۔

معین خان کا کہنا تھا کہ  آسٹریلیا کے خلاف سیمی فائنل میں بابر اعظم نے ایک اوور میں زیادہ رنز دیے جانے پر محمد حفیظ  سے اگلا اوور نہیں کرایا حالانکہ وکٹ پر موجود دونوں  کھلاڑی  بائیں بازو سے کھیلنے والے بیٹسمین تھے جبکہ دیکھا گیا تھا کہ عالمی کپ میں آخری اوورز میں فاسٹ بولرز  کی پٹائی ہوتی رہی۔

معین خان  نے اپنے صاحبزادے اعظم خان کے حوالے سے سوال کے جواب میں کہا کہ  کوئی بھی کھلاڑی  قومی ٹیم سے اخراج  کو محسوس کرتا ہے،  تاہم بھر پور محنت اور فٹنس حاصل کرکے ڈومیسٹک کرکٹ میں  اچھی کارکردگی کی بدولت آگے بڑھا جا سکتا ہے، خوشی ہے کہ اعظم خان کی ڈومیسٹک کرکٹ میں کارکردگی اچھی ہے۔

ایک سوال کے جواب میں معین خان نے کہا کہ  پی ایس ایل ایک بڑا برانڈ بن کر پاکستان کی پہچان بن چکا ہے، ہر اچھا کھلاڑی لیگ  کا حصہ بننا چاہتا ہے ، لیکن اپنی قومی ٹیم اور دیگر مصروفیات سے فارغ کھلاڑی ہی  اگلےپی ایس ایل کا حصہ بنے گا۔

معین خان نے کہا کہ نیوزی لینڈ کرکٹ ٹیم کا دورہ پاکستان چھوڑ کر چلے جانا افسوسناک تھا  لیکن اچھی بات یہ ہے کہ اب غیرملکی ٹیمیں پاکستان کا رخ کر رہی ہیں، اس سے پاکستان میں کرکٹ کو فروغ  ملے گا اورنوجوان کرکٹرز کو بہترمواقع بھی میسر آئیں گے۔

دورہ بنگلا دیشں کے حوالے سے انہوں نے کہا کہ پاکستان  اچھی کارکردگی کا تسلسل برقرار رکھ کر میزبان ٹیم کے خلاف با آسانی فتح پاسکتا ہے۔