سری نگر: بھارت کے انسداد دہشت گردی سے متعلق تحقیقاتی ادارے نے مقبوضہ کشمیر کے معروف انسانی حقوق کے رہنما خرم پرویز کو مبینہ طور پر دہشت گردوں کی فنڈنگ کے الزام میں گرفتار کرلیا۔

میڈیا رپورٹس کے مطابق تحقیقاتی ایجنسی نے خرم پرویز کے دفتر اور رہائش گاہ پر چھاپے مارے اور ان پر مبینہ طور پر دہشت گردوں کی مالی معاونت اور سازش کے الزامات عائد کیے۔

واضح رہے کہ خرم پرویز کا شمار بھارت کی حکمران جماعت بھارتیہ جنتا پارٹی (بی جے پی) کے ناقدین میں سے ہوتا ہے اور ان کا گروپ ‘جموں کشمیر کولیشن آف سول سوسائٹی’ نے کشمیر میں سیکیورٹی فورسز کی جانب سے انسانی حقوق کی خلاف ورزیوں پر متعدد رپورٹس شائع کی ہیں۔

اس کے علاوہ وہ کشمیر اور ایشیا میں جبری طور پر لاپتا کیے جانے والے افراد کے بارے میں قائم کی گئی ایک تنظیم کے سربراہ بھی ہیں۔

یاد رہے کہ اس سے قبل 2016 میں انہیں سوئٹزر لینڈ میں منعقدہ اقوامِ متحدہ کی حقوقِ انسانی کی کونسل کے اجلاس میں شرکت کی اجازت نہہں دی گئی تھی اور انہیں متنازع پبلک سیفٹی ایکٹ کے تحت بھارتی سیکیورٹی اداروں نے گرفتار کرلیا تھا۔

جس کے بعد انہیں 76 دن تک حراست میں رکھا گیا اور بعدازاں انسانی حقوق کی عالمی تنظیموں کے دباؤ پر رہا کردیا گیا۔

خرم پرویز کی گرفتاری سے متعلق اقوامِ متحدہ کی نمائندہ برائے تحفظِ انسانی حقوق میری نے سماجی روابط کی ویب سائٹ ٹوئٹر پر ایک پیغام میں کہا کہ خرم پرویز کی حراست کی خبریں تشویشناک ہیں، ’وہ کوئی دہشت گرد نہیں بلکہ انسانی حقوق کے محافظ ہیں‘۔

I’m hearing disturbing reports that Khurram Parvez was arrested today in Kashmir & is at risk of being charged by authorities in #India with terrorism-related crimes. He’s not a terrorist, he’s a Human Rights Defender @mujmash @RaftoFoundation @GargiRawat @NihaMasih pic.twitter.com/9dmZOrSwMY

— Mary Lawlor UN Special Rapporteur HRDs (@MaryLawlorhrds) November 22, 2021

علاوہ ازیں ایمنسٹی انٹرنیشنل کی جانب سے بھی خرم پرویز کی گرفتاری پر کیے گئے ایک ٹوئٹ میں کہا گیا کہ کشمیر میں انسانی حقوق کے رضا کار خرم پرویز کی گرفتاری بھارت کی جانب سے انسداد دہشت گردی قانون کے غلط استعمال کی ایک اور مثال ہے، انتظامیہ کو انسانی حقوق کی خلاف ورزیوں پر انصاف کے کٹہرے میں کھڑا کیا جانا چاہیے۔

The arrest of Kashmiri activist Khurram Parvez is yet another example of how anti-terror laws are being misused to criminalize human rights work & stifle dissent in India. Instead of targeting HRDs, authorities should focus on bringing accountability for human rights violations.

— Amnesty International (@amnesty) November 23, 2021

یہ بھی یاد رہے کہ خرم پرویز کی گرفتاری ایک ایسے وقت میں عمل میں لائی گئی ہے جب کشمیر میں حال ہی میں پولیس مقابلے میں دو شہریوں کی ہلاکت کے بعد حالات کشیدہ ہیں۔