سندھ ہائیکورٹ نے قصرفاطمہ المعروف موہاٹہ پیلس میں میڈیکل کالج کےقیام کے معاملے پروزیراعلٰی سندھ کو طلب کرلیا۔ 

سندھ ہائیکورٹ نےموہاٹہ پیلس/ قصر فاطمہ کیس میں قائد اعظم اورفاطمہ جناح کے ترکے کی تحقیقات کیلئےکمیشن بنانے کی ہدایت کردی۔

تفصیلات کے مطابق سندھ ہائیکورٹ نےموہاٹہ پیلس/ قصر فاطمہ کیس میں تحقیقات کے لیے جسٹس (ر) فہیم صدیقی پرکمیشن بنانے کا حکم دیا ہے۔

عدالت نے کہا ہے کہ کمیشن کسی بھی ادارے سےمعلومات حاصل کرسکتا ہے۔ کمیشن اپنی معاونت کیلئے کسی بھی سابق یا موجودہ سرکاری افسر کی مدد لے سکتا ہے۔

سندھ ہائی کورٹ کے حکم کے مطابق کمیشن قائد اعظم اورفاطمہ جناح کے ترکے کی تمام اشیا کی تحقیقات کرے گا۔

سرکاری وکیل نے عدالت کو بتایا کہ سندھ حکومت نے آپ کے حکم کے خلاف اپیل دائرکی ہے۔

وکیل درخواست گزارخواجہ شمس نے کہا کہ دو رکنی بینچ نے سنگل بینچ کا حکم معطل نہیں کیا۔ آفیشل اسائنی نے اشیا کی فہرست تیارکرلی ہے۔ محترمہ فاطمہ جناح کے بیڈ روم میں کباڑ رکھا ہوا ہے۔

اسسٹنٹ ایڈوکیٹ جنرل نے کہا کہ کیس ملتوی کیا جائے، ایڈوکیٹ جنرل موجود نہیں ہیں۔

سرکاری وکیل نے کہا کہ ایڈوکیٹ جنرل خود دلائل دیں گے، وقت دیا جائے۔

وکیل موہاٹہ پیلس گیلری ٹرسٹ نے کہا کہ فریق بننے کی درخواست پر دلائل دینا چاہتے ہیں۔

عدالت کا سرکاری وکیل سے مکالمہ

جسٹس ذوالقفار احمد خان نے کہا کہ سندھ میں آثارِ قدیمہ بد حالی کا شکار ہے۔ تاریخی قلعے اور محلات تباہ حال ہیں، اس پرتو آپ توجہ نہیں دے رہے۔ آپ لوگوں کی توجہ موہاٹہ پیلس پر اتنی کیوں ہے؟

عدالت نے مزید کہا کہ قصرِ فاطمہ سے قیمتی زیورات اورنوادرات تک غائب ہیں۔ اہم دستاویزات اور نوادرات کی تحقیقات کیلئے کمیشن بننا چاہیے۔

عدالت کا کہنا تھا کہ 1996 میں صرف ساڑھے چھہ کروڑ روپے قیمت لگائی گئی۔ کیا اتنی قیمتی اراضی کی قیمت اتنی کم  ہونی چاہئے؟ اپنے بزرگوں کی امانت کےساتھ  ہم کیا کررہے ہیں؟

ایڈوکیٹ خواجہ شمس نے عدالت سے کہا کہ فلیگ اسٹاف ہاؤس میں کئی ریکارڈ موجود ہے۔ وہ بھی منگوایا جائے۔

عدالت نے کہا کہ جن لوگوں سے انکوائری ہونی چاہیے ان کی فہرست دیں۔ فاطمہ جناح کے لاکرز ٹوٹے ہیں، کہاں گئی اہم چیزیں؟ قصرِفاطمہ نام رکھنے کے حکم پرعمل درآمد نہیں ہوا۔

ایڈوکیٹ خواجہ شمس بولے کہ موہاٹہ پیلس نے وزیراعلی مراد علی شاہ کے شکریے کا اشتہار شائع کیا ہے۔

اس پرعدالت نےسرکاری وکیل کو مراد علی شاہ کو پیش ہونے کی ہدایت دیتے ہوئے کہا کہ وزیراعلی سندھ سے کہیں کہ چیمبرمیں ملیں۔

اسسٹنٹ ایڈوکیٹ جنرل نے پوچھا کہ وزیراعلی کوبلانا ہے؟

عدالت نے کہا کہ جی وہ میرے ساتھ پڑھ چکے ہیں، انہیں بلائیں۔

اسسٹنٹ ایڈوکیٹ جنرل نے کہا کہ آپ کیس میں نوٹس جاری کردیں اور کیس میں بلوالیں۔

سندھ ہائی کورٹ نے کیس کی مذید سماعت آٹھ دسمبر تک ملتوی کردی۔