اسپیکر پنجاب اسمبلی چوہدری پرویزالٰہی نے کہا ہے کہ معاشرے میں امن و امان اور ترقی کیلئے معاشی خوشحالی بہت ضروری ہے۔

چوہدری پرویزالٰہی اور سینیٹر کامل علی آغا سے اوکاڑہ کی معروف سیاسی شخصیت سید گلزار حسنین اور بیٹے سید سلیمان حسنین کی ملاقات ہوئی جس میں دونوں رہنماؤں نے پاکستان مسلم لیگ میں شمولیت کا اعلان کیا۔

اسپیکر پنجاب اسمبلی کا کہنا تھا کہ خودمختار ادارے ہی جمہوریت کی ضمانت ہوتے ہیں، بروقت اور سستے انصاف کی فراہمی ہی معاشرے میں جرائم کو ختم کیا جا سکتا ہے۔

چوہدری پرویزالٰہی نے کہا کہ ہماری آزاد عدلیہ کے فیصلوں نے دنیا میں پاکستان کا وقار ہمیشہ بلند کیا ہے جبکہ ہماری عدلیہ ہمیشہ میرٹ پر فیصلوں سے آزاد ریاست کو پروان چڑھنے میں  بھی معاون ثابت ہوئی۔

اسپیکر پنجاب اسمبلی نے کہا کہ معاشرے میں امن و امان اور ترقی کیلئے معاشی خوشحالی بہت ضروری ہے، قائداعظم محمد علی جناح کے نظریہ ریاست پر عمل کر کے ہی کامیاب معاشرے کی بنیاد رکھی جا سکتی ہے۔

 چوہدری پرویزالٰہی کا کہنا تھا کہ ہماری سیاست کا مقصد عام اور غریب آدمی کو بروقت بنیادی سہولتیں فراہم کرنا ہے، آزادانہ اور شفاف الیکشن ہی معاشرے کی ترقی اور عوام کو بنیادی حقوق کی فراہمی میں اہم کردار ادا کرتے ہیں۔

ان کا کہنا تھا کہ عام آدمی کی فلاح اور جرائم کے خاتمے کیلئے پیٹرولنگ پوسٹیں قائم کیں، فوری اور سستا انصاف فراہم کرنے کیلئے کنزیومر کورٹس کا قیام عمل میں لائے۔

اسپیکر پنجاب اسمبلی چوہدری پرویزالٰہی کا مزید کہنا تھاکہ عوام کو فوری اور مفت علاج کیلئے ایمرجنسی میں مفت ادویات مہیا کیں ، فوری طبی سہولتوں کیلئے ریسکیو 1122 ایمبولینس سروس شروع کی، طلبہ کو مفت کتابیں اور طالبات کیلئے وظیفے مقرر کیے، یہ سب منصوبے فلاحی ریاست کے قیام میں معاون ثابت ہوتے ہیں، جس کا عملی مظاہرہ ہمارا کامیاب دور حکومت تھا۔

ملاقات میں سید سلیمان حسنین نے بلدیاتی الیکشن پاکستان مسلم لیگ کی ٹکٹ پر لڑنے کا عزم کیا۔

 سید گلزار حسنین نےکہا کہ چوہدری پرویزالٰہی کی عوام سے محبت اور خدمت کے جذبے سے متاثرہو کر مسلم لیگ میں شمولیت کا فیصلہ کیا۔