مشیر تجارت عبدالرازاق داؤد نے کہا ہے کہ میک ان پاکستان پالیسی کے مثبت نتائج آنا شروع ہوگئے۔

عبدالرازاق داؤد نے اپنے ایک بیان میں کہا کہ اسمارٹ فون بنانے والی دنیا کی دوسری بڑی کمپنی شیاؤمی ائیر لنک کمیونیکیشن کے اشتراک سے پاکستان میں فون بنائے گی۔

انہوں نے کہا کہ میک ان پاکستان پالیسی کے مثبت نتائج آنا شروع ہوگئے، ابتدائی طور پر ڈھائی سے تین ملین موبائل فون سالانہ پاکستان میں تیار ہونگے۔

مشیر تجارت عبدالرازاق داؤد کا مزید کہنا تھا کہ پیداواری سہولت قائد اعظم انڈسٹریل اسٹیٹ لاہور میں دی جائے گی جبکہ پیداواری سہولت جنوری 2022 میں فنکشنل ہوجائے گی جس سے 3 ہزار روزگار کے مواقع پیدا ہونگے۔

واضح رہے اس سے قبل مشیر تجارت عبدالرزاق داؤد نے سرکاری نیوز ایجنسی سے گفتگو کرتے ہوئے کہا تھا کہ پاکستان میں 50 کروڑ ڈالر کا آم کا گودا برآمد کرنے کی استعداد ہے۔

مشیر تجارت نے کہا تھا کہ جاپان نے بھی پاکستان سے آم کی درآمد کی منظوری دی ہے،2021 میں 1 لاکھ 60 ہزار ٹن آم برآمد ہونگیں۔

عبدالرزاق داؤد نے یہ بھی کہا تھا کہ گزشتہ سال 80 ہزار ٹن آم کی برآمد کا ہدف تھا لیکن ہدف سے زیادہ برآمد ہوا،آم کی برآمد اور ویلیو ایڈیشن سے کروڑوں ڈالرز زرمبادلہ کمایا جاسکتا ہے۔

مشیر تجارت عبدالرزاق داؤد نے مزید کہا تھا کہ حکومت روس اور چین کی مارکیٹوں تک پاکستانی آم کی رسائی کے اقدامات کررہی ہے۔