شبلی فراز نے کہا ہے  کہ الیکٹرانک ووٹنگ مشینوں کا مقصد بیرونی مداخلت کو روکنا ہے۔

وفاقی وزیر سائنس و ٹیکنالوجی شبلی فراز  نے پشاور میں تقریب سے خطاب کرتے ہوئے کہا کہ ماضی میں ہونے والے تمام انتخابات متنازع رہے، الیکشن کو شفاف بنانے کے لئے ای وی ایم کو جگہ دینی ہوگی۔

انہوں نے کہا کہ الیکٹرانک ووٹنگ مشینوں کا مقصد بیرونی مداخلت کو روکنا ہے، اس سلسلے میں تمام لوگوں کو بریفنگ دی جارہی ہیں۔

 وفاقی وزیر سائنس و ٹیکنالوجی کا کہنا تھا کہ انتخابی اصلاحات اور الیکٹرانک ووٹنگ مشینوں سے متعلق قانون اگلے ہفتے منظور کرالیا جائے گا۔

اپوزیشن اتحاد کے حوالے سے شبلی فراز نے کہا کہ ملک میں مہنگائی کو کنٹرول کرنے کے لیے بہترین پیکیچز لائے جارہے ہیں، اپوزیشن کے پاس قوم کے لیے اور مہنگائی کو کم کرنے کے کوئی آپشن نہیں۔

وفاقی وزیر نے کہا کہ پی ڈی ایم کو ہمیشہ ناکامی ہوئی ہے، پی ڈی ایم میں شامل جماعتوں کے درمیان اختلافات ہیں، وہ کبھی ایک نہیں ہو سکتے۔

شبلی فراز کا کہنا تھا کہ افغانستان ہمارا ہمسایہ ملک ہے، اس کی خوشحالی اور امن کا اثر پاکستان پر براہ راست ہوتا ، عالمی دنیا کو افغانستان کو تنہا نہیں چھوڑنا چاہیے۔

وفاقی وزیر سائنس و ٹیکنالوجی شبلی فراز  کا مزید کہنا تھا کہ افغانستان میں معاشی صورتحال ٹھیک نہیں جس کے لیے پاکستان سمیت دنیا بھر کو افغانستان کو مدد کرنا ہوگی۔