مسلم لیگ (ن) پنجاب کی ترجمان عظمیٰ بخاری نے فواد چوہدری اور حماد اظہر کی پریس کانفرنس پر ردعمل کا اظہار کرتے ہوئے کہا ہے کہ مسلم لیگ (ن) کا میڈیا سیل مریم نواز نے نہیں چلانا تو کیا ان جیسوں سے مشورہ لیکر چلانا ہے؟ جن کے رشتے دار اور فرنٹ مین ملک چلا رہے ہیں، ان کو میڈیا سیل پر اعتراض ہے۔

عظمیٰ بخاری نے کہا کہ مسلم لیگ (ن) کے میڈیا سیل کے لوگ والنٹیئرلی نوازشریف کے بیانیے کو سپورٹ کرتے ہیں۔

ترجمان مسلم لیگ پنجاب نے کہا آج حکومتی واویلا سے ایک بات تو ثابت ہوئی کہ ان کا عوامی مسائل سے کوئی لینا دینا نہیں، ان کے اعصاب پر صرف مریم نواز سوار ہیں۔

عظمیٰ بخاری نے مزید کہا کہ آپ جتنی مرضی انکوائریاں کروائیں، بات تو پھر یہی ہے کہ وہ باقی تمام کیسوں میں سرخرو ہوچکی ہیں، جو بات اب یہاں آگئی ہے۔

ان کا کہنا تھا کہ انکوائری کروانے سے پہلے برائے مہربانی ساڑھے تین سال میں صرف عمران خان کی شکل دکھانے پہ کتنے اربوں خرچ ہوئے، اس کا جواب دیں، کیونکہ اس اشتہاری وزیراعظم نے کام تو کوئی کیا نہیں۔

ان کا کہنا تھا کہ ٹھگوں کی بارات ثاقب نثار کی آڈیو اور ارشد ملک کی ویڈیو کا فرانزک کب کرارہے ہیں؟

انوہں نے کہا کہ مریم نواز کی پریس کانفرنس کا جواب دو، کس طرح سلیکٹڈ کو لانے کے جتن کیے گئے، ایف آئی اے کو اپنے سیاسی مخالفین کیلئے استعمال کرنا ان کا پرانا اور گھٹیا وطیرہ ہے۔