سائنسدانوں نے کورونا وائرس والے ماسک کو پاک اور دوبارہ استعمال کرنے کا ایک نہایت آسان طریقہ پیش کردیا۔

اس طرح ایک ماسک کو بار بار استعمال کیا جاسکتا ہے اور کووڈ سے پیدا ہونے والے کچرے کو بھی کم کیا جاسکتا ہے۔

ویسے تو اوون ہر گھر میں موجود ہوتا ہے جس میں صرف پانچ منٹ تک گرم کرکے ماسک کو پاک صاف کیا جاسکتا ہے۔

یہ تحقیق رائس یونیورسٹی کے پروفیسر ڈینیئل پریسٹن نے کی ہے، وہ کہتے ہیں کہ عین یہی طریقہ کورونا کے علاوہ بھی دیگر کئی اقسام کے جراثیم کو آسانی سے تلف کرسکتا ہے۔

اس کے لئے صرف اتنا کرنا ہوگا کہ ماسک کو چند منٹ تک اوون میں رکھ کر 70 درجے سینٹی گریڈ تک گرم کریں ،اس طرح  کرنے سے99.9 سارس کووڈ وائرس تلف ہوجاتے ہیں۔

اس کے علاوہ الٹرا وائلٹ شعاعوں سے بھی جراثیم کو مارا جاتا ہے لیکن بالائے بنفشی شعاعوں کی سہولت ہر گھر میں موجود نہیں ہوتی۔

 دورسری جانب یہ شعاعیں ڈاکٹری لباس (پی پی ای) اور ماسک کی تہوں تک نہیں پہنچتی۔

اس ضمن میں تحقیق بہت کم کی گئی تھی لیکن مسلسل تحقیق سے ثابت ہوا کہ کپڑے کے ماسک بھی حرارت سے جراثیم سے مکمل طور پر پاک ہوجاتے ہیں۔

 اب اگر روایتی ماسک کو پانچ منٹ سے زیادہ بھی گرم کیا جائے تو اس کے معیار پر کوئی فرق نہیں پڑتا اور نہ ہی وہ کمزور ہوکر پھٹتا ہے۔

واضح رہے کہ یہ تحقیق جرنل آف ہازرڈوز مٹیریئل میں شائع ہوئی ہے۔