پاکستان پیپلز پارٹی میں مئیر پشاور کے ٹکٹ پر اختلافات سامنے آگئے، میئر پشاور کا ٹکٹ ارباب زرک کو دیدیا گیا۔

اس سے قبل پارٹی کی جانب سے سٹی مئیر کا ٹکٹ ضیا اللہ آفریدی کو دیا گیا تھا۔

چئیرمین بلاول بھٹو کی مداخلت پر ضیاء اللہ آفریدی کو ٹکٹ واپس کرنے کی ہدایت کی گئی، ضیاء اللہ آفریدی کے انکار پر پارٹی نے ٹکٹ کینسل کردیا۔

ضیاء اللہ آفریدی نے آزاد امیدوار کی حیثیت سے سٹی مئیر کے لئے انتخاب لڑنے کا فیصلہ کیا ہے۔

ضیاء اللہ افریدی نے بول نیوز سے گفتگو میں کہا کہ مئیر شپ  ٹکٹ کی واپسی کیلئے پی پی پی قیادت نے رابطہ نہیں کیا، مجھے الیکشن کمیشن کی جانب سے اطلاع دی گئی۔

ضیاء اللہ آفریدی  نے کہا کہ میں نے پارٹی قیادت کی درخواست پر ہی الیکشن لڑنے کا فیصلہ کیا تھا، پارٹی قیادت نے اعتماد میں لئے بغیر ٹکٹ واپس لے لیا۔

ان کا کہنا تھا کہ آزاد حیثیت سے مئیر شپ کیلئے انتخاب لڑونگا، پشاور شہر کی بہتری میرا خواب ہے، پشاور ہم بنائیں گے، یہ میرا نعرہ ہے۔

ان کا مزید کہنا تھا کہ پارٹی اگر میرے خلاف ایکشن لیتی ہے تو کوئی پرواہ نہیں۔

خیال رہے کہ مئیر پشاور کیلئے پانچ سیاسی جماعتوں کے امیدوار میدان میں ہیں۔ ارباب زرک پاکستان پیپلز پارٹی کے پلیٹ فارم سے مئیر پشاور کیلئے انتخاب لڑیں گے ۔

پاکستان تحریک انصاف نے رضوان بنگش، اے این پی نے حاجی شیر رحمان کو میدان میں اتارا ہے، جبکہ جماعت اسلامی نے مئیر پشاور کیلئے بحرااللہ کو نامزد کردیا ہے ۔ جمیت علماء اسلام  سے حاجی زبیر علی مئیر پشاور کی نشت پر انتخاب لڑیں گے۔