حکومت پنجاب نےمزدورطبقے کا معیار زندگی بلند کرنے اوران کے بچوں کے تعلیمی وظائف کے حوالے سے اقدامات کی رپورٹ پنجاب اسمبلی میں پیش کردی۔

پنجاب اسمبلی میں پنجاب حکومت کی رپورٹ میں ایوان کو بتایا گیا کہ حکومت پنجاب نے صوبہ بھر میں مزدور کی کم سے کم اجرت 17 ہزار 5 سو روپے مقررکی ہے۔

رپورٹ میں کہا گیا کہ پنجاب مینمم ویجزایکٹ 2019 کی شق 21 کے تحت اجرت میں خواتین اور مرد کے درمیان کسی قسم کی تفریق غیر قانونی ہے۔

رپورٹ میں مزدور طبقے کے معیارِزندگی بلند کرنے کے لیے ڈائریکٹر لیبر ویلفیئر کے انسپکٹران مزدوروں کو دی جانے والی سہولیات کی مسلسل انسپکشن اورمزدور طبقے کے بچوں کے لیے پنجاب ورکرز ویلفیئر فنڈ سے 65 اسکولوں کے قیام کا ذکر ہے۔

رپورٹ میں کہا گیا کہ ان اسکولوں میں 43 ہزار704 ورکرز کے بچوں کو مفت معیاری تعلیم مہیا کی جاتی ہے جبکہ ورکرزکے بچوں کو کاپیاں، کتابیں، یونیفارم، ٹرانسپورٹ اوراسٹیشنری مفت دی جاتی ہیں۔

ایوان کو رپورٹ میں بتایا گیا کہ لیبر اینڈ ہیومن ریسورس ڈپارٹمنٹ کے توسط سے مزدور بچوں کو تعلیمی وظائف بھی دیے جاتے ہیں  جبکہ انٹرمیڈیٹ لیول کے بچوں کو 3 ہزار5 روپے ماہوار اور گریجویشن لیول کے طلبا کو 4 ہزار5 روپے وظیفہ دیا جاتا ہے۔

پنجاب حکومت کی پیش کردہ رپورٹ میں ماسٹر لیول کے تعلیمی وظائف کی شرح 5 ہزار5 سو روپے کے علاوہ طلبا کو دیگر اخراجات ایڈمیشن فیس، ٹیوشن فیس، ٹرانسپورٹ چارجز، ہاسٹل چارجز ادا کیے جانے کا ذکر درج ہے۔

رپورٹ میں کہا گیا کہ طلبا کو رجسٹریشن فیس، امتحانی فیس، لائبریری فیس، لیب فیس اورکمپیوٹر فیس ادا کی جاتی ہے جبکہ ایم فل، ایم ایس اور پی ایچ ڈی کے حامل طلبا کو تعلیمی اخراجات ادا کیے جاتے ہیں۔

رپورٹ میں بتایا گیا کہ رجسٹرڈ کارکنان کی ہر بچی کی شادی پردو لاکھ روپے بطور شادی گرانٹ اورکارکن کی فوتیدگی پرچھ لاکھ فوتیدگی گرانٹ دیےجاتے ہیں۔ ورکرز ویلفئیر فنڈ کی توسط سے صنعتی کارکنان کےلیے پنجاب میں 29 لیبرکالونیاں الاٹ کی گئی ہیں۔ لیبر کالونیوں میں 22ہزار 654 پلاٹس، دو ہزار آٹھ سو ستائیس اور30981 فلیٹس بھی شامل ہیں۔