شہری کے گھر میں داخل ہوکر تشدد کرنے اور قتل کی دھمکیاں دینے کے کیس میں مفرور رکن سندھ اسمبلی ملک شہزاد اعوان کو اشتہاری اور گرفتاری کا خوف ستانے لگا۔

ایم پی اے ملک شہزاد اعوان نے  ڈسٹرک جج ویسٹ کے روبرو عبوری ضمانت کی درخواست دائر کردی، جسے عدالت کی جانب سے منظور کرلیا گیا۔

عدالت کی جناب سے ملک شہزاد اعوان کو ایک لاکھ روپے زر ضمانت جمع کرانے کا حکم دیا گیا۔ ساتھ ہی ملزم کو ٹرائل کورٹ میں پیش ہونے کا حکم دے دیا۔

عدالت نے ملک شہزاد اعوان کو تفتیش میں تعاون کرنے ہدایت جاری کی۔

جوڈیشیل مجسٹریٹ ملزم ملک شہزاد اعوان کا قومی شناختی کارڈ بلاک کرنے کا حکم دے چکے ہیں۔

اسپیکر سندھ اسمبلی کو بھی ملک شہزاد اعوان کے  وارنٹ گرفتاری سے آگاہ کردیا گیا تھا۔

پولیس کی جانب سے پیش کئے گئے چالان کے مطابق ملزم ملک شہزاد سمیت تین ملزمان شہری ملک اسلم کے گھر مسلح داخل ہوئے اور ان کے بیٹے سجاد کو کلاشنکوف کے بٹ مار کر ہاتھ  مفلوج کردیا۔

 چالان کے متن کے مطابق ملزمان نے خواتین سے بدتمیزی کی اور مدعی مقدمہ کو زدوکوب کوب کیا اور قتل کی دھمکیاں دیں۔

وکیل مدعی صفی الدین اعوان کا کہنا ہے کہ پولیس نے مقدمے کو بی کلاس کردیا تھا، سیشن عدالت میں  بی کلاس رپورٹ کو چیلنج کیا، جس کے بعد سیشن عدالت نے پولیس رپورٹ کو مسترد کرکے تفتیش دوبارہ شروع کرنے کا حکم دیا تھا۔

وکیل مدعی کا کہا ہے کہ مقدمہ میں اب تک 3 تفتیشی افسران تبدیل ہو چکے ہیں، عدالت نے تفتیشی افسر سے ملزمان کی گرفتاری اور پراگریس رپورٹ بھی کر رکھی ہے۔

پولیس کے مطابق دیگر مفرور ملزمان میں عمران شاہ اور قیصر شامل ہیں، ملزمان کے خلاف تھانہ مدینہ کالونی میں مقدمہ درج ہے۔