وزیر بلدیات سندھ ناصر حسین شاہ نے کہا ہے کہ اصلاحات سے عام شہری کو سہولت اور آسانی میسر آسکے گی۔

 چیئرمین پیپلز پارٹی بلاول بھٹو زرداری کی ہدایت پر وزیراعلیٰ سندھ کی قائم کردہ بلدیاتی قوانین و اصلاحات سے متعلق کمیٹی کا اجلاس ہوا۔

اجلاس کی صدارت اصلاحات کمیٹی کے سربراہ وزیر بلدیات سندھ ناصر حسین شاہ نے کی۔ اجلاس میں سندھ کی لوکل کونسلز کے حوالے سے امور پر بات چیت کی گئی۔

 سیکریٹری بلدیات ملک کے دیگر صوبوں میں موجود بلدیاتی نظام اور بلدیاتی قوانین سے متعلق اجلاس کو  تفصیلی  بریفنگ دی گئی۔

ناصر حسین شاہ  نے کہا کہ بلدیاتی نظام اور بلدیاتی قوانین میں اصلاحات کے لئے ایک اچھا اور متوازن ایکٹ نہایت ضروری ہے، اس سے صوبے کے تمام شہروں اور علاقوں میں بلدیاتی امور کو منظم طریقے سے سر انجام دینا ممکن ہوگا۔

وزیر بلدیات سندھ ناصر حسین شاہ  نے مزید کہا کہ اصلاحات سے عام شہری کو سہولت اور آسانی میسر آسکے گی، پارٹی قیادت اور وزیر اعلیٰ سندھ کی ہدایات ہیں کہ صوبے میں رہنے والوں کو بلدیاتی نظام کے حوالے سے بہترین خدمات فراہم کی جاسکیں۔

   اجلاس میں وزیر اطلاعات سندھ سعید غنی،  مشیر قانون و ایڈمنسٹریٹر بیرسٹر مرتضیٰ وہاب، بیرسٹر ارسلان شیخ، سیکریٹری بلدیات سندھ نجم شاہ، ڈی جی ایس بی سی اے، ایم ڈی سولڈ ویسٹ سمیت بلدیاتی اداروں کے افسران نے شرکت کی۔