پی ٹی آئی رہنما خرم شیر زمان نے کہا ہے کہ شہباز شریف پاکستان کے سب سے بہترین اداکار ہیں۔

خرم شیر زمان نے اپنے ایک بیان میں شہباز شریف کو میرا نیلا پیلا اور گلابی سلام، اتنے اعتماد اور ڈھٹائی سے جھوٹ بولنا بڑی ہمت کا کام ہوتا ہے۔

انہوں نے کہا کہ شہباز شریف کرپشن کی دلدل میں سر تک دھنسے ہوئے ہیں، نیب پوچھتی ہے تو فرماتے ہیں میرے بچوں سے میرا کوئی واسطہ نہیں۔

پی ٹی آئی رہنما خرم شیر زمان کا مزید کہنا تھا کہ شہباز شریف صاحب پاکستان کے سب سے بہترین اور باصلاحیت اداکار ہیں، صدر پاکستان سے درخواست کرونگا کہ چھوٹے میاں کو اداکاری پہ تمغہ حسن کارکردگی دیں۔

اس سے قبل پاکستان مسلم لیگ (ن) کے صدر اور قائد حزب اختلاف شہباز شریف نے وزیراعظم عمران خان کا ریلیف پیکج مسترد کردیا تھا۔

شہباز شریف کا کہنا تھا کہ موجودہ حکومت کے وعدوں اور بجٹ کی طرح ان کے نام نہاد ریلیف پیکج بھی جھوٹ کا پلندہ ہیں۔

ان کا کہنا تھا کہ کیا بجٹ دیتے ہوئے نہیں کہاگیا تھا کہ یہ ٹیکس فری بجٹ ہے؟ اب قوم سے خطاب پر اعتراف کیاجارہا ہے کہ پٹرول مہنگا ہوگا،جب پٹرول مزید مہنگا ہوگا، بجلی گیس کی قیمت بڑھے گی تو مہنگائی کیسے نہیں ہوگی؟

مسلم لیگ ن کے صدر نے کہا تھا کہ جس حکومت کے بجٹ اعدادوشمار ناقابل اعتبار ہوں، اس کی کسی بات کو سنجیدہ سمجھنا خود فریبی کے سوا کچھ نہیں ،ملک قرض کے بوجھ میں دب چکا ہے، آئی ایم ایف کی شرائط نے قوم کا بھرکس نکال دیا ہے۔

شہبا ز شریف نے کہا تھا کہ ریلیف اور پی ٹی آئی دومتضاد چیزیں ہیں ، نام نہاد ریلیف پیکج کے اعلان کے وقت ہی یوٹلیٹی اسٹور پر گھی اور خوردنی تیل 65 روپے لیٹر مہنگا ہونے کا اعلان ہورہا تھا۔

انہوں نے کہا تھا کہ ہول سیل مارکیٹ میں چینی 130 روپے کلو سے تجاوز کرچکی ہے، کوئٹہ میں 50 کلو چینی کی بوری میں 270 روپے اضافہ ہوا، دو دن میں چینی کی فی کلو قیمت میں 5 روپے اضافہ ہوا ، جھوٹے وعدے کرنے والی حکومت کی کسی بات پر قوم کو اعتماد نہیں۔

اپوزیشن لیڈر کا کہنا تھا کہ ملک میں چینی کا ذخیرہ 15 روز کا رہ گیا ہے اور ٹی وی پر خطاب کا شوق پورا کیاجارہا ہے، مہنگائی کا تاریخی ریکارڈ قائم کرنے کے بعد خطاب کی نہیں ، ناکامی کے اعتراف کے ساتھ استعفی دینے کی ضرورت ہے۔

شہباز شریف نے کہا تھ کہ مہنگائی کو عالمی مسئلہ قرار دے کرعمران نیازی حکومت اپنی نااہلی، نالائقی ، غلط فیصلوں اور کرپشن چھپا نہیں سکتی۔

انہوں نے کہا تھا کہ حکومت کیسے ہوتی ہے، نوازشریف نے دکھایا تھا، ترقی کی شرح 5.8 فیصد اور مہنگائی کی شرح 3.6 فیصد پر لائے تھے۔

مسلم لیگ ن کے صدر نے کہا تھا کہ آپ 3 سال میں 15000 ارب قرض لیں تو مہنگائی، بے روزگاری تو ہوگی ، جو عوام کو ریلیف نہیں دے سکتا، وہ حکومت بھی نہیں کرسکتا، ظلم کی حکومت نہیں چل سکتی ، یہ حکومت عوام کی گردن پر چھری چلا کر کہتی ہے کہ ریلیف دے رہے ہیں۔

شہباز شریف کا کہنا تھا کہ قوم کو یہ سبق یاد ہوچکا ہے کہ مہنگائی بڑھتی ہے تو وزیراعظم چور ہے، آئی ایم ایف سے سبسڈی ختم کرنے کا وعدہ کرنے والی حکومت 120 ارب سبسڈی پیکج دینے کا دھوکہ دے رہی ہے۔

مسلم لیگ ن کے صدر شہباز شریف کا مزید کہنا تھا کہ یہ پیسہ کہاں سے آئے گا؟ کیسے خرچ ہوگا؟ 1200 ارب کورونا اور کراچی پیکج کے پیسوں پر سنگین سوالات پر کوئی جواب نہیں ، آئی ایم ایف سے کیا شرائط طے ہو رہی ہیں، پارلیمنٹ سے کیوں چھپایا جا رہا ہے؟