آئی فون کے حوالے سے شہرت رکھنے والی ایپل کارپوریشن نے آئی کار بھی پیش کرنے کی تیاری کرلی ہے جو بجلی سے چلے گی۔

اس منصوبے پر پچھلے سات سال سے کام ہورہا ہے لیکن اس بارے میں زیادہ تفصیلات دستیاب نہیں اور یہ سارا کام انتہائی رازداری سے کیا جارہا ہے۔

برطانوی کار لیزنگ کمپنی واناراما نے اپنے ایک تازہ بلاگ میں ایپل آئی کار کا مکمل تھری ڈی ڈیزائن جاری کردیا ہے۔

واناراما کے مطابق اس کار میں ایک خودکار الکحل میٹر بھی نصب ہوگا جو ڈرائیور کے بیٹھتے ہی اس کے نشے میں ہونے یا نہ ہونے کا پتا لگا لیگا۔

اس کار کی تھری ڈی تصاویر دیکھ کر ایسا لگتا ہے جیسے آئی فون کی شکل میں معمولی تبدیلی کر کے اس کے نیچے پہیے لگا دیئے گئے ہوں۔

اس کے علاوہ دروازوں کے ہینڈل، آئی فون کے بٹنوں جیسے رکھے گئے ہیں جبکہ کار کی سفید رنگت بالکل ویسی ہے جیسی 2010 میں آئی فون 4 کی تھی۔

ایپل آئی کار کی ایک بڑی اسمارٹ فون اسکرین ہوگی جس پر سامنے کا منظر اور سفر سے متعلق دوسری معلومات بھی ایک ساتھ دیکھی جاسکیں گی ،کار کی سیٹیں لچک دار لیکن مضبوط ہوں گی جنہیں گھمایا بھی جاسکے گا جبکہ ڈیش بورڈ بھی مکمل طور پر کسٹمائزیبل ہوگا، یعنی ڈرائیور اپنی سہولت کے حساب سے ڈیش بورڈ کو تبدیل کرسکے گا۔

واناراما کا دعوے اپنی جگہ لیکن یہ تھری ڈی ڈیزائن بھی بہرحال ایک اندازے سے زیادہ کچھ نہیں۔

ایپل آئی کار اصل میں کیسی ہوگی؟ اس کا حتمی جواب تو ایپل کارپوریشن ہی کے پاس ہے جس نے اس بارے میں مکمل خاموشی اختیار کر رکھی ہے۔

واناراما کا دعوی ہے کہ یہ ڈیزائن بالکل درست اور حقائق پر مبنی ہے کیونکہ یہ اُن پیٹنٹس کی بنیاد پر تیار کیا گیا ہے جو ایپل کارپوریشن نے پچھلے چند سال کے دوران امریکی پیٹنٹ آفس سے حاصل کی ہیں ,البتہ پیٹنٹ نمبر US10309132B1 اور US10384519B1 کو سب سے اہم قرار دیا گیا ہے جن میں سے پہلی کا تعلق کار کی بیرونی ساخت سے جبکہ دوسری پیٹنٹ اس کار کے اندرونی حصوں یعنی ڈیش بورڈ، ونڈ اسکرین اور سیٹوں وغیرہ کے بارے میں ہے۔

امریکن پیٹنٹ آفس کی ویب سائٹ سے ان دونوں میں سے کسی ایک پیٹنٹ کی بھی تصدیق نہیں ہوسکی لیکن ٹیکنالوجی سے وابستہ عالمی حلقے پھر بھی اس رپورٹ کو معتبر قرار دے رہے ہیں

اندازہ ہے کہ یہ ایپل آئی کار 2025 تک فروخت کے لئے پیش کردی جائے گی۔