آرمی چیف جنرل قمر جاوید باجوہ نے کہا ہے کہ آپریشنل ڈرلز کی مسلسل پریکٹس خطرات کے مؤثر جواب کے لئے اہم ہے۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے کھاریاں کا دورہ کیا ، مشقوں کے علاقے میں آمد پر کور کمانڈر ون کور لیفٹیننٹ جنرل شاہین مظہر محمود نے آرمی چیف کا استقبال کیا ۔

آئی ایس پی آر  کے مطابق دورے کے دوران آرمی چیف جنرل قمر جاوید باجوہ کو مشقوں پر جامع بریفنگ دی گئی۔

آئی ایس پی آر   کا کہنا ہے کہ مشقوں کا مقصد آرمی وار گیمز کے آپریشنل تصورات کو جانچنا تھا جبکہ فارمیشنز کی آپریشنل تیاریوں، مختلف دفاعی و جارحانہ ٹاسک پورے کرنا مشقوں کا مقصد تھا۔

آئی ایس پی آر  کا یہ بھی کہنا ہے کہ مشقوں میں وی ٹی فور ٹینک، فضائی مدد سمیت جدید ویپن سسٹمز کا استعمال کیا گیا۔

اس موقع پر آرمی چیف نے مشقوں میں شریک دستوں کی آپریشنل تیاریوں اور پروفیشنلزم کو سراہا جبکہ آرمی چیف نے فوج میں نئے شامل کردہ چینی وی ٹی فور ٹینکوں کی کارکردگی پر مکمل اطمینان کا  بھی اظہار کیا۔

آرمی چیف جنرل قمر جاوید باجوہ نے کہا کہ آپریشنل ڈرلز کی مسلسل پریکٹس خطرات کے موثر جواب کے لئے اہم ہے، کسی بھی مہم جوئی کا مقابلہ کرنے کے لیے زمانہ امن میں حقیقی تربیت لازمی ہے۔