فواد چوہدری نے کہا ہے کہ عدلیہ پر حملہ کرنا، ججوں پر الزامات لگانا اور ویڈیوز بنانا ن لیگ کی تاریخ رہی ہے۔

وفاقی وزیر اطلاعات فواد چوہدری نے میڈیا سے گفتگو کرتے ہوئے کہا کہ کتنا مضحکہ خیز شگوفہ ہے کہ چیف جسٹس آف پاکستان میرے پاس آئے، ہم چائے پی رہے تھے، اچانک چیف جسٹس کو خیال آیا انہوں نے فون اٹھایا کہ فلاں جج کو فون کردیں۔

وفاقی وزیر اطلاعات نے کہا کہ میڈیا میں ایڈیٹوریل چیک ہونا بہت ضروری ہے، اس طرح کوئی خبر بڑے اخبار میں بغیر ایڈیٹوریل نہیں لگ سکتی۔

فواد چوہدری کا کہنا تھا کہ اخبار نے یہ چیک کرنا مناسب نہیں سمجھا کہ جس جج کا نام لے رہے ہیں وہ جج بینچ میں ہی شامل ہی نہیں ہے۔ بدقسمتی سے کسی جج کا نام لے کر اتنی بڑی ہیڈ لائن لگا کر غیر ذمہ داری کا مظاہرہ کیا گیا۔

وفاقی وزیر اطلاعات نےکہا کہ چیف جسٹس صاحب کے سوموٹو کا خیرمقدم کرتے ہیں، ن لیگ کے شاہد خاقان عباسی اور خواجہ آصف نے سوموٹو نوٹس لینے کے بعد پریس کانفرنس کی اور پھر عدالتوں کو سکینڈل بنانے کی کوشش کی۔

فواد چوہدری نے یہ بھی کہا کہ اسلام آباد ہائی کورٹ کو ان دونوں حضرات کو بھی اپنے سوموٹو نوٹس میں بلانا چاہیے، جب جج صاحبان نے نوٹس لے لیا تھا تو ان کا کام نہیں بنتا کہ وہ اس پر پریس کانفرنس کرتے۔

وفاقی وزیر اطلاعات کا کہنا تھا کہ آج وزیراعظم عمران خان سے پاکستان تحریک انصاف کی اتحادی جماعتوں کے ارکان کی ملاقات ہوئی ہے۔ جی ڈی اے، ایم کیو ایم، مسلم لیگ (ق)، بلوچستان عوامی پارٹی سمیت تمام قیادت موجود تھی۔

فواد چوہدری کا یہ بھی کہنا تھا کہ اتحادیوں کے اعتراضات تفصیل سے سنے، انہیں دور کیا گیا، اتحادیوں نے وزیراعظم عمران خان کی قیادت اور پاکستان تحریک انصاف پر اپنے مکمل اعتماد کا اظہار کیا ہے۔

وفاقی وزیر اطلاعات فواد چوہدری کا مزید کہنا تھا کہ مشترکہ فیصلہ ہوا ہے کہ پارلیمنٹ کا مشترکہ اجلاس بدھ کو دن دو بجے طلب کیا جائے گا، الیکٹورل ریفارمز کے بل اجلاس میں پیش کئے جائیں گے، تمام اتحادی حکومت کے ساتھ کھڑے ہیں۔