بلدیاتی انتخابات میں میئر پشاور کیلئے ٹکٹوں کے معاملے پر سیاسی کارکن آپس میں ہی تقسیم ہوگئے۔

پاکستان پیپلزپارٹی نے کرپشن کے الزامات پر ڈسٹرکٹ میئر کے لئے نامزد کیے گئے امیدوار ضیاءاللہ آفریدی سے ٹکٹ واپس لے لیا اور سابق وزیر ارباب عالمگیر کے صاحبزادے ارباب ذرک کو میئر پشاور کے امیدوار کے لیے کھڑا کردیا۔

پیپلزپارٹی کی جانب سے ارباز ذرک کو نامزد کرنے پر ضیاءاللہ آفریدی نے پارٹی سے بغاوت کرتے ہوئے آزاد حیثیت سے ڈسرکٹ میئر کے انتخابات لڑنے کا اعلان کردیا۔

الیکشن کمیشن آف پاکستان کی جانب سے ضیااللہ آفریدی کو انتخابی نشان بھی آلاٹ کردیا گیا ہے۔ ضیاءاللہ آفریدی اس سے پہلے پاکستان تحریک انصاف سے بھی بغاوت کر چکے ہیں۔

دوسری جانب پاکستان تحریک انصاف کی جانب سے کاروباری شخصیت اور پشاور ریجن کے سابق سینئر نائب صدر رضوان بنگش کو میئر پشاور کیلئے ٹکٹ جاری کرتے ہوئے اپنے نظریاتی کارکن سید قاسم علی شاہ کو نظر انداز کردیا۔

پاکستان تحریک انصاف کی جانب سے میئر کے انتخاب کے لیے دوسرے خواہشمند امیدوار مینا خان کو بھی ٹکٹ نہیں دیا گیا  جس پر پارٹی کارکن آپس میں تقسیم ہوگئے۔

بلدیاتی انتخابات کے لیے ٹکٹوں کی تقسیم کے بعد پاکستان تحریک انصاف کے اندرونی اختلافات بھی شدت اختیارکرگئے ہیں جب کہ میئر پشاور کیلئے ٹکٹوں کے معاملے پر سیاسی جماعتوں کے کارکن تقسیم ہونے پر پارٹیوں کو بھی مشکلات کا سامنا کرنا پڑ رہا ہے ۔