آل پاکستان پرائیویٹ سکولز فیڈریشن نے سموگ کے حوالے سے سکولز بند کرنے کی تجاویز مسترد کر دیں۔

صدر آل پاکستان پرائیویٹ سکولز فیڈریشن کاشف مرزا کا کہنا ہے کہ طلبا کے تعلیمی نقصان کا ازالہ ممکن نہیں ہے۔ پرائیویٹ سکولز نے اسموگ کے تدارک اور قابو پانے کےلیے لاہور، فیصل آباد، گوجرانوالہ اور ملتان میں اوقات کار پہلے ہی تبدیل کردئیے ہیں۔

کاشف مرزا نے کہا کہ حکومت سکولز بند کرنے کی بجائے آل پاکستان پرائیویٹ سکولز فیڈریشن کی سموگ سفارشات پر عمل درآمد کو یقینی بنائے۔

آل پاکستان پرائیویٹ سکولز فیڈریشن کی جانب سے ایئر کوالٹی انڈیکس خطرناک سطح تک بگڑنے پر سکولز کو بند کرنے کی بجائے لازم ماسک اور اوقات کار محدود کرنے کی تجاویز دی گئی ہیں۔

کاشف مرزا نے کہا کہ آوٹ ڈور اسمبلی اور تمام تر سپورٹس سرگرمیاں 4 ہفتوں کے لیے ختم کردی ہیں۔

تجاویز میں مطالبہ کیا گیا کہ کہ حکومت دھویں دار انڈسٹری اور یورو ٹو آئل پر ایک ماہ کے لیے پابندی لگائے۔ کٹائی کے بعد فصلوں کو آگ لگانے کا عمل فوری بند کیا جائے۔ غیر ضروری اشیا لانے والے تمام ٹرکوں کی لاہور، فیصل آباد، گوجرانوالہ اور ملتان آمدو رفت پر پابندی عائد کی جائے۔ ان شہروں کے مضافات میں کوئلے سے چلنے والے پاور پلانٹس بند کردیئے جائیں۔

کاشف مرزا نے تجاویز کے حوالے سے مزید کہا کہ سموگ بڑھنے کی بڑی وجہ دھواں چھوڑنے والی فیکٹریوں، صنعتوں اور اینٹوں کے بھٹوں کے خلاف مؤثر اقدامات کئے جائیں۔ دھواں پھیلانے والی فیکٹریوں اور اینٹوں کے بھٹوں کو نومبر اور دسمبر کیلئے بند کر دیا جائے۔ سموگ کے خطرے سے بچنے کیلئے ضروری ہے کہ زیادہ سے زیادہ درخت لگائے جائیں۔

دوسری جانب سموگ کی بڑھتی ہوئی صورتحال کے پیش نظر ریلیف کمشنر پنجاب بابر حیات تارڑ نے پنجاب کے سرکاری و نجی سکولوں میں ایک اضافی چھٹی دینے کا اعلان کیا ہے۔ ہفتہ اور اتوار کے ساتھ پیر کی چھٹی شامل کرنے کا اعلان کردیا گیا۔

ریلیف کمشنر کی جانب سے جاری ہدایت کے مطابق 27 نومبر سے 15 جنوری تک تین چھٹیوں پر عمل درآمد کیا جائے، اضافی چھٹیوں میں ورچوئل کلاسز پڑھانے کی ہدایات جاری کردی ہیں۔