اسلام آباد: جماعت اسلامی کے زیر اہتمام مہنگائی کے خلاف مارچ کے شرکا کا ڈی چوک پہنچ گئے۔

ڈی چوک پر مہنگائی مارچ کے شرکا اور اسلام آباد پولیس کے درمیان جھڑپیں شروع ہوگئیں، شرکا نے پولیس پر پتھراؤ کیا اور پولیس چوکی پر توڑ پھوڑ کی۔

قبل ازیں امیر جماعت اسلامی سراج الحق نے جماعت اسلامی یوتھ اسلام آباد مارچ کے شرکاء سے خطاب کرتے ہوئے کہا کہ آج اتنے بڑے نوجوان اسلام آباد میں جمع ہو کر آئینہ دکھا رہے ہیں، جس طرح کی حکومت مسلط کی گئی ہے وہ ایک کروڑ نوکریاں کیا ایک کروڑ پھلیاں بھی نہیں دے سکتی، نوجوان میرے ملک کا مستقبل ہیں۔

امیر جماعت اسلامی مہنگائی مارچ کے شرکا سے خطاب کررہے ہیں

ان کا کہنا تھا کہ ڈگریاں جلانے کی ضرورت نہیں ظالم، جابروں اور لوٹ مار کرنے والوں کو جلانے کی ضرورت ہے، حکمرانوں نے نوجوانوں کو مایوس کردیا ہے، پارلیمنٹ میں 74 سالوں سے نوجوانوں کی نمائندگی نہیں، پارلیمنٹ میں بین الاقوامی اسٹبلشمنٹ اور آئی ایم ایف کے ایجنٹ بیٹھے ہیں، یہ آپ کے مفادات کیلئے نہیں ہیں۔

انہوں نے کہا کہ کرپٹ مافیا اور پاکستان ساتھ ساتھ نہیں چل سکتے، پاکستان تا قیامت قائم رہے گا، ان کرپٹ حکمرانوں اور کشمیر کا سودا کرنے والوں کو گھر بھیج کر دم لیں گے، عمران خان نے وعدہ کیا تھا کہ اگر 1 ہزار نوجوانوں نے گو عمران گو کا نعرہ لگایا تو میں استعفیٰ دے دوں گا، آج آپ کی جماعت کے جلسوں میں بھی گو عمران گو اور نو عمران نو کے نعرے لگ گئے۔

امیر جماعت اسلامی سراج الحق کا مزید کہنا تھا کہ آپ نے الیکشن کمیشن کے خلاف اعلان جنگ کیا اور 22 کروڑ عوام کے ساتھ دھوکہ کیا، عمران خان، اللہ سے ڈرو آپ کے ہر لفظ کو اللہ نے اپنے ریکارڈ میں محفوظ کرلیا، قیامت میں بھی آپ کی پکڑائی ہوگی، عمران خان اور نواز شریف دونوں لندن کے کرکٹ گراؤنڈ میں اکٹھے کرکٹ کھیلیں گے، آپ نے قوم اور قوم کے بچوں کے ساتھ انصاف نہیں کیا۔