ترجمان دفترخارجہ عاصم افتخار احمد نے کہا ہے کہ طاقت کے استعمال سے نہتے کشمیریوں کی جدوجہد کو کچلا نہیں جا سکتا۔

تفصیلات کے مطابق اپنے ایک بیان میں ترجمان دفترخارجہ نے بھارتی غیر قانونی مقبوضہ کشمیر میں کشمیریوں کے خلاف مسلسل تشدد کی مذمت کی ہے۔

 عاصم افتخار احمد نے کہا کہ پاکستان کو مقبوضہ کشمیر میں تیزی سے ابتر ہوتی انسانی حقوق اور سیکیورٹی صورتحال پر شدید تحفظات ہیں۔

ترجمان دفترخارجہ کا کہناتھا کہ بھارتی قابض افواج نہتے کشمیریوں کے خلاف تشدد جاری رکھے ہوئے ہیں، ایسے ہی ایک بہیانک واقعہ میں شوپیاں میں ایک کشمیری نوجوان کو بیدردی سے شہید کیا گیا۔

 عاصم افتخار احمد نے کہا کہ بھارتی ریاستی دہشت گردی،دباؤ،وسیع البنیاد تشدد اور انسانی حقوق و بین الاقوامی انسانی قوانین کی خلاف ورزیوں کے باوجود کشمیری حق خود ارادیت کی منصفانہ جدوجہد پر پرعزم ہیں۔

ترجمان دفترخارجہ نے کہا کہ بھارت کو سمجھنا چاہیے کہ بربریت،طاقت کے استعمال سے نہتے کشمیریوں کی جدوجہد کو کچلا نہیں جا سکتا۔

عاصم افتخار احمد  نے یہ بھی کہا کہ پاکستان بھارت پر دباؤ ڈالتا ہے کہ وہ فی الفور مقبوضہ کشمیر میں اہنی ریاستی دہشت گردی کو بند کرے، بھارت اپنی قابض افواج کو مقبوضہ کشمیر میں انسانی حقوق کی بھیانک خلاف ورزیوں کے لیے احتساب کے کٹہرے میں کھڑا کرے۔

ترجمان دفترخارجہ عاصم افتخار احمد کا مزید کہنا تھا کہ بھارت مقبوضہ کشمیر میں غیر انسانی عسکری محاصرہ اٹھائے جبکہ بھارت کشمیریوں کو اقوام متحدہ سلامتی کونسل قراردادوں کے مطابق حق استصواب رائے استعمال کرنے کی  بھی آزادی دے۔