سعید غنی نے کہا ہے کہ پیٹرول کا موجودہ بحران بھی کوئی نیا ڈرامہ لگتا ہے۔

اپنے ایک بیان میں وزیر اطلاعات سندھ سعید غنی نے کہا کہ گھر میں گیس نہیں آرہی، مہمان آئے تو باہر سے کھانا منگوا کر کھلایا۔

سعید غنی نے کہا کہ چند ماہ پہلے بھی پیٹرول کا بحران پیدا ہوا تھا، تب بھی اس حکومت نے ایک رات میں 25 روپے اضافہ کردیا تھا۔

وزیر اطلاعات سندھ سعید غنی  کا مزید کہناتھا کہ پیٹرول کا موجودہ بحران بھی کوئی نیا ڈرامہ لگتا ہے، ڈر لگ رہا ہے کہ آنے والے وقت میں پیٹرول اور بھی مہنگا ہوجائے گا۔

واضح رہے کہ ملک بھر میں پیٹرول پمپ مالکان نے اپنے مطالبات کے حق میں ہڑتال کررکھی ہے، جس کی وجہ سے عوام کو پریشانی کا سامنا ہے۔

علاوہ ازیں پیٹرول پمپس کی بندش کے باعث ٹرانسپورٹروں نے کرایہ بڑھا دیا ہے۔ اندرون و بیرون ضلع میں چلنے والی گاڑیوں کے کرایہ میں 30 فیصد تک اضافہ ہوا ہے، کرایہ میں اضافے پر عوام نے اعلیٰ حکام سے نوٹس لینے کا مطالبہ کر دیا ہے۔

عوام نے پیٹرول پمپ مالکان کے خلاف رد عمل دیتے ہوئے کہا کہ عوام کو ذلیل کرنے والے پاکستان میں کاروبار کرنے کے مستحق نہیں، پیٹرول پمپ بند کرنے پر پمپ مالکان کے خلاف سخت ایکشن لیا جائے، ہڑتال کرنے والے پیٹرول پمپس کا لاںٔسنس کینسل کر کے ان کے خلاف قانونی کاروائی کی جائے۔

دوسری جانب حکومت کا کہنا ہے کہ پیٹرول پمپس کے ناجائز مطالبات کو تسلیم نہیں کیا جائے گا۔