وزیراعظم عمران خان کی زیر صدارت ترجمانوں کا اجلاس ختم ہوچکا ہے جس کی اندرونی کہانی اب منظر عام پر آگئی ہے۔

اجلاس میں سابق چیف جسٹس ثاقب نثار کی مبینہ آڈیو لیک معاملے پر بحث ہوئی، وزیراعظم نے ترجمانوں کو (ن) لیگ کی ماضی کی تاریخ اجاگر کرنے کی ہدایت کرتے ہوئے کہا کہ عوام کو بتایا جائے شریف فیملی کیسے ججز پر حملے کرتی رہی ہے۔

وزیراعظم نے کہا کہ یہ مافیا ہے جو اپنے مرضی کے فیصلے لینے کے لیے ججز پر دباو ڈالتا ہے، ان کے ایسے ہتھکنڈے اب ملک پر نہیں چلیں گے۔ ماضی میں بھی یہ مافیا عدلیہ پر حملہ آور ہوتے رہے۔

وزیراعظم عمران خان نے کہا کہ حکومت اداروں کا احترام کرتی ہے اور ان کے ساتھ کھڑی ہے۔

اجلاس میں وزیراعظم عمران خان آئندہ الیکشن الیکٹرانک ووٹنگ مشین پر کرانے کے لیے پرعزم دکھائیدئیے۔

وزیراعظم نے ای وی ایم سے متعلق عوام کو اعتماد میں لینے کی ہدایت کرتے ہوئے کہا کہ آئندہ الیکشن ہر صورت ای وی ایم پر ہی کرائیں گے۔

وزیراعظم نے اوورسیز کو ووٹ ڈالنے میں تمام رکاوٹیں دور کرنے کی ہدایت کرتے ہوئے کہا کہ اوورسیز کے ووٹ میں جو جو رکاوٹیں ہیں دور کی جائیں، بیرون ملک پاکستانیوں کے پاسپورٹ اور نائیکوپ کے ایشوز کو جلد حل کیا جائے، حکومت نے اوورسیز کےساتھ جو وعدہ کیا ہر صورت پورا کریں گے۔

ترجمانوں کے اجلاس میں مہنگائی پر بھی بات چیت ہوئی۔ وزیراعظم نے کہا کہ مہنگائی گلوبل ایشو ہے، حکومت عوام کو ریلیف کے لیے اقدامات اٹھا رہی، عوام کو دنیا بھر میں مہنگائی سے متعلق اعدادوشمار پر اعتماد میں لیں۔