چئیرمین پیپلزپارٹی بلاول بھٹو کی مولانا فضل الرحمان سے ملاقات کی اندرونی کہانی سامنے آ گئی۔

پی پی ذرائع کےمطابق چئیرمین بلاول بھٹو کی مولانا فضل الرحمن سےملاقات خوشگوارماحول میں ہوئی۔ ملاقات میں دونوں رہنماؤں نے محتاط اندازمیں گفتگوکی۔

پی پی ذرائع کا کہنا ہے کہ مولانا فضل الرحمن کی بلاول بھٹو سے ملاقات نشستن، گفتن برخاستن تھی۔ دونوں رہنماؤں نے ملاقات میں مشترکہ سیاسی جدوجہد پربات نہیں کی۔

ذرائع نے کہا کہ بلاول بھٹونے مولانا فضل الرحمن سے ان کی صحت کے بارے میں دریافت کیا۔

مولانا فضل الرحمن نے بلاول بھٹو سےآصف زرداری کی صحت کے حوالے سے خیریت دریافت کی۔

ذرائع کےمطابق مولانا فضل الرحمن، بلاول بھٹوملاقات میں پی ڈی ایم زیربحث نہیں آئی۔ بلاول بھٹو نے پارلیمنٹ میں مولانا اسعد محمود کی فعالیت کوسراہا۔ پارلیمنٹ میں فعال کردارادا کرنے پر بلاول بھٹو نے مولانا اسعد کی تعریف کی۔

پی پی کے ذرائع نےبلاول بھٹو زرداری کا مؤقف بیان کرتے ہوئے کہا کہ اپوزیشن کے اتحاد کے باعث حکومت کو پارلیمنٹ میں شکست دینا ممکن ہوا۔ اپوزیشن کے اتحاد کے باعث حکومت کو پارلیمنٹ کا مشترکہ اجلاس ملتوی کرنا پڑا۔

ذرائع کے مطابق چئیرمین پیپلز پارٹی کا کہنا ہے کہ اپوزیشن کے اتحادی کی وجہ سے پی ٹی آئی کو اپنے اتحادیوں کی مخالفت کا سامنا ہے۔ ملاقات میں افغانستان کے معاملے پربھی گفتگو ہوئی۔

پیپلز پارٹی کے ذرائع کا یہ بھی کہنا ہے کہ بلاول بھٹو مولانا فضل الرحمن کے لیےمٹھائی کا تحفہ لے کرگئےتھے۔ بلاول بھٹو نے بھانجے کی پیدائش کی خوشی میں مٹھائی پیش کی۔