ٹی ایل پی کے سربراہ سعد حسین رضوی کا کہنا ہے کہ الیکشن 2023 کے لیے بھر پور تیاری کررہے ہیں اور اگر الیکشن قابل از وقت ہوتے ہیں تو تیار ہیں۔

تحریک لبیک پاکستان (ٹی ایل پی) کے سربراہ حافظ سعد حسین رضوی کا کہنا ہے کہ ظلم وبربریت کی داستان رقم کرنے والوں سے کسی قسم کی کوئی بات نہیں ہوگی سیاست کا مطلب یہ نہیں کہ کچھ بھی کیا جائے ، سیاست کو عبادت سمجھتے ہیں۔

سعد حسین رضوی کا کہنا تھا کہ سیاسی لوگوں سے ملاقاتوں اور بات چیت کا سلسلہ ہمیشہ قائم رہے گا تاہم اتحاد کا فیصلہ مشاورت اور اطمینان سے کریں گے جب کہ الیکشن 2023 کے لیے بھر پور تیاری کررہے ہیں اور اگر الیکشن قابل از وقت ہوتے ہیں تو تیار ہیں۔

سربراہ ٹی ایل پی نے کہا کہ تمام جماعتوں کا بھرپور انداز میں مقابلہ کریں گے اور ملک بھر سے اپنے امیداوار کھڑے کریں گے ، قوم نے ہم پر اعتماد کیا ہے انشاءاللہ پا کستان کے ہر شہری کے اعتماد پر پورا اتریں گے ، عوام الیکشن میں تحریک لبیک پاکستان کا بھرپور ساتھ دیں۔

سعد حسین رضوی کا کہنا تھا کہ آج ملک میں ہر طبقہ احتجاج کررہا ہے، موجودہ حکمرانوں نے ملک کا ہر لحاظ سے بیڑا غرق کر دیا ہے ، موجودہ حکمران پاکستان کی عوام کا خون نچوڑرہے ہیں ، بیرون  ملک سے پاکستان کے اربوں روپے لوٹی ہوئی دولت واپس لانے والے غیروں سے قرض نہ لینے کے دعوے دار، آئی ایم ایف کا قرض اُس کے منہ پر مار کر لوٹانے والے آئی ایم ایف سے کشکول لیکر پاؤں پڑے ہوئے ہیں۔

سعد رضوی نے کہا کہ کمزور نظریے والے ملک کی کیا خدمت کریں گے  ، الزام تراشی اور ذاتی دشمنیوں نے ملک کو آگے بڑھنے نہیں دیا ، حکمرانوں کے احتساب اور عوام کے بنیادی حقوق کا تحفظ ہی ملک میں ترقی کا ضامن ہوگا لیکن حکومت اور اپوزیشن ذاتی مقاصد میں مصروف ہیں۔

سربراہ ٹی ایل پی نے کہا کہ ہمارے زمہ داران و کارکنان نے جن حالات کا سامنا کیا پا کستان کی تاریخ میں ایسے حالات کا سامنا کسی جماعت کے لوگوں نے نہیں کیا ، کسی نے نہ تو وفاداریاں تبدیل کی نہ ہی کسی نے اعلان لا تعلقی کیا ،  زمہ داران و کارکنان ہر محاذ پر ثابت قدم رہے میں تما م کو سلام عقیدت پیش کرتا ہوں۔

سعد حسین رضوی کا مزید کہنا تھا کہ پاکستان اسلام کے نام پر بنا ہمارے بزرگوں اور آباؤ اجداد نے ملک کے لیے قربانیاں دی کوئی میلی آنکھ سے نہ دیکھے ، پاکستان اور اسلام کے وسیع تر مفاد میں ہر کام کریں گے۔