کراچی: پاکستان میری ٹائم سیکیورٹی ایجنسی نے منشیات اسمگلنگ کے خلاف کامیاب کارروائی کرتے ہوئے چھ اسمگلرز کو گرفتار کرلیا۔

پاکستان میری ٹائم سیکیورٹی ایجنسی اور پاکستان کسٹمز انٹیلی جنس کراچی کے مشترکہ انٹیلی جنس پر مبنی کاؤنٹر نارکوٹکس آپریشن میں منشیات کی اسمگلنگ کرنے والوں کو گرفتار کیا گیا-

آپریشن کے دوران مکران کے ساحل کے قریب شمالی بحیرہ عرب میں تین غیر ملکیوں سمیت 6 سمگلروں کو گرفتار کیا گیا۔

غیر ملکی کشتی سے 233 کلو گرام منشیات برآمد کی گیئں۔ جس کی مالیت کا تخمینہ بین الاقوامی مارکیٹ میں 1.4 بلین روپے پاکستانی لگایا گیا ہے۔

پکڑی گئی منشیات کو کشتی اور اسمگلروں کے ساتھ مزید تفتیش اور قانونی کارروائی کے لیے پاکستان کسٹمز انٹیلی جنس کراچی کے حوالے کر دیا گیا ہے۔ جس میں ریاست مخالف سرگرمیوں میں کسی فرد یا گروہ کے ملوث ہونے کی تحقیقات اور قانونی ضابطے کی تکمیل شامل ہے۔

ترجمان پاکستان میری ٹائم سیکورٹی ایجنسی کا اس حوالے سے کہنا ہے کہ پاکستان میری ٹائم سیکیورٹی ایجنسی اور پاکستان کسٹمز انٹیلی جنس کراچی کا کامیاب آپریشن جس کے نتیجے میں منشیات کی ضبطگی ہوئی، اس بات کا ثبوت ہے کہ ہم کسی بھی غیر قانونی کام / مقاصد کے لیے پاکستانی پانیوں کے استعمال کو روکنے کے لیے چوکس اور پرعزم ہیں۔

ترجمان پاکستان میری ٹائم سیکورٹی ایجنسی نے کہا کہ پاکستان میری ٹائم سیکیورٹی ایجنسی سمندر میں امن و امان قائم کرنے کے لیے اپنی قومی ذمہ داریوں کو نبھاتا رہے گا۔