وزیراعظم  عمران خان نے کسانوں کے مسائل حل کرنے کی اہمیت پر زور دیا ہے۔

وزیراعظم عمران خان سے جنوبی پنجاب کے کسانوں کے وفد کی ملاقات ہوئی جس میں وزیراعظم نے کسانوں کے مسائل حل کرنے کی اہمیت پر زور دیا۔

وزیراعظم کو بریفنگ دیتےہوئے کہا گیا کہ آبی ذخائر میں پانی کی 28 فیصد کمی کی وجہ سے ربیع کی فصل متاثر ہونے کا امکان ہے ۔

 بریفنگ دیتےہوئے کہا گیا کہ پاکستان زراعت کے لیے قدرتی وسائل سے مالا مال ہے، دنیا کی بہترین زمینی مٹی، متنوع موسمی حالات، بہترین آبپاشی کا نظام موجود ہے

 بریفنگ دیتےہوئے مزید  کہا گیا کہ حکومتوں کی غلط ترجیحات کی وجہ سے اپنے زرعی شعبے کی صلاحیت کو مکمل طور پر استعمال نہیں کر سکے۔

اس موقع پر وزیراعظم  عمران خان  نے کہا کہ نہروں میں پانی کی چوری روک کر اس کمی کو پورا کیا جا سکتا ہے، نہروں میں پانی کی چوری روکنے کے لیے محکمہ آبپاشی پنجاب کے ساتھ مل کر فوری اقدامات کیے جائیں۔

وزیراعظم  کا کہنا تھا کہ  متعلقہ حکام کارٹیلائزیشن سے نمٹنے اور ذخیرہ اندوزی کے طریقوں سے بچنے کے لیے متعلقہ قوانین پر عمل کریں۔

وزیراعظم  نے کہا کہ  زرعی شعبے کی مکمل صلاحیتوں کو تلاش کرنے کے لیے حکومت نے 2000 ارب روپے کا زرعی ایمرجنسی پروگرام شروع کیا ہے۔

اپنے بیان میں انہوں نے کہا کہ 277 ارب روپے اس شعبے کے لیے مختص کیا گیا ہے، اس اقدام کا مقصد گندم، چاول، گنا، دالوں اور تیل کے بیجوں کی فصلوں کی پیداواری صلاحیت کو بڑھانا ہے۔

 وزیراعظم کا کہنا تھا کہ ہماری حکومت زراعت کے شعبے کو جدید بنانے کے لیے چھوٹے کسانوں کو کسان کارڈز فراہم کر رہی ہے، اس کارڈ کے ذریعے کسانوں کو مختلف سرکاری پروگراموں کے فوائد ملیں گے۔

عمران خان نے کہا کہ حکومت کی سازگار پالیسیوں کی وجہ سے گندم، چاول، مکئی، گنے کی پیداوار ریکارڈ ہوئی اور   آلو، پیاز اور مونگ پھلی کی پیداوار میں کووڈ کی وبا ءکے باوجود ریکارڈ سطح پر اضافہ ہوا ہے۔

وزیراعظم  عمران خان کا مزید کہنا تھا کہ کسانوں کو فصلوں کے قرضے اور کھاد، بیج اور کیڑے مار ادویات پر سبسڈی ملے گی۔

اجلاس میں وزیر برائے نیشنل فوڈ سیکیورٹی سید فخر امام، وزیر صنعت مخدوم خسرو بختیار اور وزیر توانائی محمد حماد اظہر نے شرکت کی۔